HOTUBA YA RAIS KIKWETE KWENYE MEI MOSI HUKO MOROGORO!!

HOTUBA YA RAIS WA JAMHURI YA MUUNGANO WA TANZANIA, MHESHIMIWA JAKAYA MRISHO KIKWETE, KWENYE KILELE

CHA SIKUKUU YA WAFANYAKAZI DUNIANI,

MEI MOSI, 2011 MOROGORO



Rais wa Shirikisho la Vyama vya Wafanyakazi Nchini (TUCTA),

Ndugu Ayoub Omari Juma;

Mheshimiwa Jaji Mkuu;

Mheshimiwa Gaudensia Kabaka (Mb) Waziri wa Kazi na Ajira;

Mhe. Col Issa Machibya, Mkuu wa Mkoa wa Morogoro;

Waheshimiwa Mawaziri na Wabunge Mliopo Hapa;

Ndugu Alexio Musindo, Mwakilishi wa Shirika la Kazi Duniani (ILO)

Kanda ya Afrika Mashariki;

Kaimu Katibu Mkuu, Shirikisho la Vyama vya Wafanyakazi ,

Ndugu Nicholaus Mgaya;

Waheshimiwa Mabalozi Mliopo Hapa;

Mwenyekiti wa, Chama cha Waajiri Tanzania (ATE),

Dr. Aggrey Mlimuka;

Wawakilishi wa Vyama vya Siasa na Serikali;

Ndugu Wafanyakazi na Wananchi Wenzangu;

Mabibi na Mabwana:



Shukrani

Nakushukuru sana ndugu Ayoub Omari Juma, Rais wa Shirikisho la Vyama vya Wafanyakazi Tanzania, kwa kunialika kuja kujumuika nanyi katika sherehe za mwaka huu za kuadhimisha Siku ya Wafanyakazi Duniani. Hongereni kwa maandalizi mazuri ya sherehe hii ambayo naambiwa yamesimamiwa na Chama cha Walimu Tanzania. Si ajabu yamefana kiasi hiki kwani tusingetegemea kitu pungufu kuliko hiki kutoka kwa Walimu.

Napenda pia kutoa shukrani na pongezi kwa wenyeji wetu, viongozi na wananchi wa mkoa wa Morogoro wakiongozwa na Mkuu wa Mkoa huu Lt. Col. Issa Salehe Machibya. Tunawashukuru kwa mapokezi mazuri na kazi kubwa na nzuri waliyofanya ya kufanikisha sherehe hizi. Waswahili wanasema “usione vinaelea vimeundwa“ na waundaji si wengine bali ni viongozi na wananchi wa Manispaa ya Morogoro. Tunawashukuru na kuwapongeza sana.

Poleni kwa Msiba

Ndugu Rais wa TUCTA;

Ndugu Wafanyakazi;

Narudia tena kuwapeni pole kwa msiba mkubwa uliowakuta tarehe 4 Aprili, 2011 kutokana na kifo cha Katibu Mkuu wa Chama cha Wafanyakazi wa Reli marehemu Sylvester Rwegasira. Kifo chake cha ghafla ni pigo kubwa siyo tu kwa familia yake iliyopoteza mlezi na wafanyakazi waliopoteza kiongozi mahiri, bali pia kwa taifa letu kwa jumla. Sote tumepoteza mtu muhimu. Tuendelee kumuombea kwa Mwenyezi Mungu ampe mapumziko mema. Amin.

Pongezi kwa Wafanyakazi Bora

Ndugu Rais wa TUCTA na Ndugu Wafanyakazi;

Niruhusuni nitumie fursa hii, pia, kuwapongeza wafanyakazi waliotunukiwa tuzo za ufanyakazi bora siku ya leo. Wahenga wamesema, “Chanda chema huvishwa pete”. Wenzetu leo wamevishwa pete ya ushindi inayotambua uchapakazi wao, ufanisi wao na nidhamu yao kazini. Wakati tunawapongeza kwa ushindi nawaomba, wao wenyewe, wachukulie tuzo walizopata kuwa ni changamoto ya kuwataka waongeze bidii zaidi kazini ili waendelee kuwa wafanyakazi wa mfano kwa wengine. Naomba waelewe kuwa wapo wenzao wengi wazuri ambao hawakubahatika kwa sababu nafasi ni moja tu. Kwa wafanyakazi wengine tuzo walizopata wenzenu iwe kichocheo kwenu kuongeza bidii na nidhamu kazini ili mwaka ujao nanyi muwe wapokea tuzo. “Inawezekana, timiza wajibu wako”.

Ndugu Rais wa TUCTA na Ndugu Waajiri;

Utaratibu huu wa kutambua na kutunuku utendaji kazi mzuri wa wafanyakazi ni jambo jema. Unasaidia kuongeza ari ya kazi na ufanisi kazini. Aidha, huhamasisha wafanyakazi kufanya kazi kwa bidii na maarifa. Lazima tuudumishe na kuuboresha hasa kwa aina ya zawadi wanazopata wafanyakazi bora.

Kauli Mbiu ya Mwaka Huu

Ndugu Rais wa TUCTA, Ndugu Wafanyakazi;

Namshukuru sana Mheshimiwa Waziri Gaudencia Kabaka kwa maelezo yake ya utangulizi. Yameweka msingi mzuri kwa mimi kuweka lami. Aidha, nakushukuru sana Rais wa TUCTA kwa maneno yako ya hekima ya kunikaribisha kuzungumza na hadhara hii. Nawashukuru sana kwa risala yenu iliyosomwa kwa ufasaha na Kaimu Katibu Mkuu wa TUCTA, Ndugu Nicolas Mgaya. Risala yenu imejitosheleza kwa hoja na ina ushauri mwingi mzuri kuhusu mikakati ya kuboresha mishahara na maslahi ya wafanyakazi. Napenda kuwahakikishia kuwa tumeupokea kwa mikono miwili ushauri huo na tutaufanyia kazi.

Nakubaliana na ujumbe wa kauli mbiu yenu ya mwaka huu kwamba “Serikali isipojali haki zenu, wafanyakazi watakuwa watumwa ndani ya nchi yao”. Ni ukweli uliowazi kwamba Serikali inao wajibu wa kulinda haki za wafanyakazi nchini. Lakini ni kweli pia kwamba wajibu wa kulinda haki za wafanyakazi hauko mikononi mwa Serikali pekee. Upo pia kwa waajiri na wafanyakazi wenyewe kupitia au kwa kuongozwa na vyama vyao. Mimi naamini, wote tukitimiza wajibu wetu ipasavyo, tutaweza kuyapatia ufumbuzi matatizo yanayowakabili wafanyakazi hapa nchini.

Ndugu Rais wa TUCTA;

Napenda kuwahakikishieni kuwa Serikali inatambua ukweli huo na wajibu wake huo. Serikali yetu na zile za awamu zilizopita zimekuwa zinachukua hatua za kulinda na kuendeleza maslahi ya wafanyakazi. Viwango vya mafanikio vimekuwa vinapishana. Yapo mambo ambayo tumeweza kupata mafanikio makubwa na yapo ambayo mafanikio yake si makubwa sana. Hata hivyo, juhudi zimekuwa zinaendelea. Hakuna upuuzaji na wala hakuna upungufu wa utashi wa kisiasa wa kutafuta ufumbuzi wa matatizo yanayowakabili wafanyakazi.

Ndugu Wafanyakazi,

Utashi wa Serikali katika kutekeleza wajibu wake wa kulinda haki za wafanyakazi nchini umejidhihirisha wazi kupitia hatua za kisheria na za kiuchumi ambazo imekuwa inatekeleza. Kwa upande wa sheria, napenda kutambua sheria tatu ambazo zipo kwa ajili ya kulinda na kuendeleza haki na maslahi ya wafanyakazi nchini. Sheria hizo ni: Sheria ya Utumishi wa Umma ya mwaka 2001, Sheria ya Taasisi za Kazi ya mwaka 2004 na Sheria ya Ajira na Mahusiano Kazini ya mwaka 2004.

Ninyi viongozi wa vyama vya wafanyakazi na wafanyakazi mnatambua vyema kuwa katika sheria hizi haki na wajibu wa wafanyakazi na waajiri vimeainishwa vizuri. Aidha, utaratibu na mifumo ya kulinda haki hizo na uhusiano na mawasiliano baina yao imefafanuliwa vyema. Vile vile, vyombo vya utekelezaji vimetajwa pamoja na majukumua ya kila chombo.

Ndugu Rais wa TUCTA;

Wakati tunaingia madarakani tulijikuta tunalo jukumu la kihistoria la kuhakikisha kuwa sheria hizo zinatekelezwa kama ilivyokusudiwa. Sheria ya Utumishi wa Umma tuliifanyia marekebisho mwaka 2008 kwa lengo la kuweka utaratibu wa haki zaidi wa ajira na kuwapandisha vyeo watumishi wa umma na kutambua kanuni za mahusiano bora kazini (Code of good conduct).

Kwa sheria ya Taasisi za Kazi na ile ya Ajira na Mahusiano Kazini tulitengeneza Kanuni zake na hivyo kuwezesha kuanza kutumika. Kwa ajili hiyo, mfumo wa ushirikishaji wafanyakazi kuhusu masuala ya mishahara yao na maslahi mengineyo ukaanzishwa rasmi. Miongoni mwa hayo ni kuundwa kwa Baraza la Majadiliano kwa upande wa sekta ya umma, Baraza la Ushauri la Masuala ya Kazi, Uchumi na Kijamii (LESCO), Baraza la Usuluhishi na Upatanishi na Bodi za Mishahara za Kisekta kwa upande wa sekta binafsi. Serikali yetu imekamilisha jukumu lake la kuhakikisha kuwa vyombo hivyo vinaundwa na kufanya kazi yake ipasavyo.

Ndugu Rais wa TUCTA na Ndugu Wafanyakazi;

Haya ni mapinduzi makubwa katika kulinda haki na kuendeleza maslahi ya wafanyakazi nchini. Wafanyakazi wameongezewa fursa ya kutoa maoni yao na kauli yao kusikika katika kujadili viwango vya ujira wao na waajiri wao. Inawezekana si kila wanachotaka wafanyakazi kikatekelezwa au wakakipata kwa kiwango kile walichotaka, lakini hawatoki mikono mitupu. Pia, hoja zao zinakuwa zikisikika na wao wamewasikia waajiri wanachosema. Hakika hatua tuliyofikia si ndogo hata kidogo. Kwa upande wa LESCO, naambiwa kuwa katika Bara la Afrika pengine ni sisi na Afrika ya Kusini tu ndiyo wenye chombo cha namna hiyo.

Wajibu wa Waajiri na Serikali

Ndugu Wafanyakazi;

Katika kulinda na kuendeleza haki za wafanyakazi, waajiri nao wana wajibu wa kuhakikisha kwamba wanafuata matakwa ya sheria za kazi za nchi. Aidha, wanao wajibu wa kudumisha mahusiano mema kazini kwa manufaa yao wenyewe na wafanyakazi wao. Nimesikia kilio cha wafanyakazi kwamba pamoja na kuwepo sheria na mifumo ya kulinda haki za wafanyakazi, wapo baadhi ya waajiri wanapuuza yote hayo. Wapo ambao hawaheshimu sheria zihusuzo ajira wala mishahara na maslahi ya wafanyakazi wao. Wapo pia wanaokataza wafanyakazi wao kujiunga na vyama vya wafanyakazi na hawaruhusu matawi ya vyama hivyo kufunguliwa katika maeneo yao ya kazi.

Ni vyema waajiri wote wakatambua kwamba kufanya hivyo ni kosa la jinai na wanastahili adhabu kali. Nakuomba Mheshimiwa Waziri, Msajili wa Vyama Huru vya Wafanyakazi na Kamishna wa Kazi msimamie sheria kwa ukamilifu. Wabaneni kisawasawa waajiri wote ili waheshimu sheria za kazi za nchi. Wasiotii wachukuliwe hatua na kuwajibishwa ipasavyo. Mamlaka mnayo, yatumieni. Asiwatishe mtu ye yote kwani sheria zinawalinda. Aidha, wabaneni Maafisa wa Kazi na Wakaguzi wa Kazi watimize ipasavyo wajibu wao. Baadhi yao wanalalamikiwa kuwa hawatendi haki na wanaonekana kuegemea sana upande wa waajiri wanaowakandamiza wafanyakazi.

Mheshimiwa Waziri;

Sisemi kuwa maafisa hao wasiwe wakweli kama wafanyakazi hawana haki. Ninachosema ni kuwa lazima hisia hizi hasi za kuwa wanawapendelea waajiri zifutike kwa wao kutenda haki na waonekane wanafanya hivyo. Msichelee kuwawajibisha wanaopindisha sheria. Si vibaya mkafanya uhamisho wa maofisa wenu waliokaa kituo kimoja kwa muda mrefu. Wahenga wanasema: “mazoea yana taabu”





Wajibu wa Wafanyakazi

Ndugu Rais wa TUCTA na Ndugu Wafanyakazi;

Kwa upande wenu, yaani vyama vya wafanyakazi na wafanyakazi wenyewe, nanyi mnao wajibu muhimu katika juhudi za kulinda na kuendeleza haki za wafanyakazi. Wajibu wenu wa msingi ni ule wa kudai haki zenu bila woga huku mkizingatia sheria na kununi za kufanya hivyo. Ndiyo maana vyama vya wafanyakazi vipo. Timizeni ipasavyo wajibu wenu huo. Kila kilio kina wenyewe.

Ili malengo yenu yafanikiwe kwa urahisi ni muhimu sana kwenu kuhakikisha kuwa wanachama wenu wanazifahamu vyema sheria na kanuni za kazi zinazowahusu. Mfanyakazi anayejua sheria atafahamu vyema nini cha kudai na akidai vipi ili apate mafanikio. Atafanya hivyo kwa kujiamini na hatimaye atafanikiwa. Kamwe mfanyakazi huyo hatokuwa mtumwa.

Ndugu Wafanyakazi;

Pamoja na hayo lazima vyama vya wafanyakazi na wafanyakazi kutambua kuwa ulinzi wa haki za wafanyakazi huanzia kwa wafanyakazi kutekeleza vyema wajibu wao na majukumu yao katika kazi zao. Kwa kawaida waajiri huwapenda na kuwaenzi wafanyakazi hodari wa kazi na waaminifu na huchukia wavivu, wezi, wasiokuwa waadilifu na watovu wa nidhamu.

Wafanyakazi wenyewe na Vyama vya wafanyakazi viwakumbushe wafanyakazi kujiepusha na vitendo vya uvivu, utoro, wizi, ubadhirifu na utovu wa nidhamu. Wasipojiepusha na hayo wanaifanya kazi ya kutetea na kulinda haki zao kuwa ngumu kwao na wadau wengine kama sisi. Lazima wakati wote tukumbuke kuwa kila haki ina wajibu.

Ajira na Utandawazi

Ndugu Rais wa TUCTA;

Katika risala yenu mmelizungumzia tatizo la ajira na kukumbusha umuhimu wa kulitafutia ufumbuzi. Nakubaliana nanyi kwamba lipo tatizo kubwa la ukosefu wa ajira hasa miongoni mwa vijana na ni tatizo linalozidi kukua mwaka hadi mwaka.

Tunalitambua tatizo hili na tunayo mikakati ya kukabiliana nalo. Tulifanikiwa katika lengo letu la kuongeza ajira milioni moja katika miaka mitano iliyopita. Na ukweli ni kwamba tulivuka lengo kwa zaidi ya ajira 330,000. Hata hivyo, tatizo ni kubwa sana kiasi kwamba mafanikio tuliyopata yamekuwa kama vile kuweka tone la maji baharini. Tunautambua ukweli huu na tumejipanga kuendelea kukabiliana na tatizo hili. Lengo letu ni kufanya maradufu ya safari iliyopita. Niruhusuni nielezee mtazamo wetu na hatua tunazokusudia kuchukua kukuza ajira nchini.

Ndugu Wafanyakazi na Ndugu Wananchi;

Ajira zinaongezeka iwapo uchumi unakua. Yaani shughuli za uzalishaji mali na utoaji wa huduma zinapoongezeka ndipo watu zaidi wa kufanya kazi huhitajika na hivyo ndivyo ajira zinavyokuzwa. Ni muhimu tutambue pia kwamba kuongezeka kwa uzalishaji mali na utoaji wa huduma kunategemea kuongezeka kwa uwekezaji. Bila ya uwekezaji kuongezeka hakuna uzalishaji mali wala utoaji huduma utakaoongezeka na hivyo hakutakuwepo na ongezeko la ajira.

Ndugu Rais wa TUCTA na Ndugu Wafanyakazi;

Ndiyo maana Serikali yetu imekuwa inatoa msukumo maalum wa kuhamasisha na kuvutia uwekezaji nchini. Tunafanya hivyo kwa upande wa Serikali na ule wa sekta binafsi. Serikali ikiwekeza katika ujenzi wa shule, zahanati, barabara na miradi mingineyo, ajira huzalishwa wakati wa ujenzi na baada ya ujenzi. Kwa mfano, ujenzi wa sekondari za kata na upanuzi wa shule za msingi, licha ya kuajiri watu wengi wakati wa ujenzi, umewezesha walimu wapya 83,075 kuajiriwa katika miaka mitano iliyopita. Hivi sasa kuna nafasi wazi za walimu 74,996 zinazohitaji kujazwa.

Ndugu Rais wa TUCTA na Ndugu Wafanyakazi;

Kwa upande wa sekta binafsi, mikakati yetu inahusu kutengeneza mazingira mazuri kwa wawekezaji wa ndani na nje kuwekeza vitega uchumi vyao nchini. Katika miaka mitano iliyopita miradi ipatayo 3,881 yenye thamani ya kiasi cha dola za Marekani milioni 27,330 ilisajiliwa katika Kituo cha Uwekezaji (TIC). Miradi hiyo ambayo iko katika hatua mbalimbali za utekelezaji inategemewa kuzalisha ajira 444,343. Bado uwekezaji kutoka nje ni mdogo ukilinganisha na fursa za uwekezaji zilizopo nchini. Ni dhamira yetu kuongeza juhudi ya kuvutia wawekezaji zaidi kuja nchini na kuzalisha ajira. Madamu msukosuko wa uchumi wa mwaka 2009 na 2010 ulisababisha kasi ya uwekezaji kupungua duniani na nchini umekwisha, matumaini ya kufanikiwa yapo. Lazima tuchemke kuvutia wawekezaji kuja kuwekeza nchini.

Ajira ya Wageni

Ndugu Rais wa TUCTA;

Katika risala yenu pia, mmelalamikia wageni kupata ajira zinazostahili kuwa za wananchi. Hayo ni makosa yanayosababishwa na watendaji katika mamlaka za utoaji wa vibali. Nakuomba Mheshimiwa Waziri Gaudencia Kabaka na namuomba Mheshimiwa Shamsi Vuai Nahodha, Waziri wa Mambo ya Ndani kuhakikisha kuwa maofisa wahusika katika Wizara zenu wanatimiza ipasavyo wajibu wao kuhusu suala hili. Ni dhambi kuacha Watanzania hawana ajira na kuwapendelea wageni pale isipostahili. Nawaomba wafanyakazi msichoke kutoa taarifa ili makosa hayo yarekebishwe.

Wawakezaji Wazawa

Ndugu Wafanyakazi;

Kwa wawekezaji wa ndani, mikakati yetu inalenga kutengeneza mazingira mazuri kwa wajasiriamali wadogo, wakati na wakubwa kuvutika na kuwekeza nchini kwao. Miongoni mwa hatua ambazo tumekuwa tunachukua ni pamoja na kupunguza urasimu na kurahisisha taratibu za kupata leseni, kuanzisha miradi na kupata mikopo kutoka asasi za fedha.

Kwa upande wa wajasiriamali wadogo, kwa sababu ya mazingira mazuri tuliyoyatengeneza yamekuwapo mashirika kadhaa yanayotoa mikopo midogo midogo (micro finance schemes). Wengi wamenufaika. Na sisi Serikalini tumeendelea kuimarisha mifuko inayotoa mikopo yenye masharti nafuu kama vile Mfuko wa Vijana na Mfuko wa Wanawake na tumeanzisha Mfuko wa Uwezeshaji wa Wananchi Kiuchumi.

Ndugu Rais wa TUCTA, Ndugu Wafanyakazi;

Katika kipindi cha miaka mitano iliyopita mifuko hii imekopesha fedha nyingi kwa Watanzania wengi ambao wamewekeza katika shughuli mbalimbali zilizozalisha ajira kwa watu wengi pamoja na wao wenyewe kujiajiri.

Kwa upande wa Mfuko wa Vijana, kwa mfano, SACCOS mbili katika kila Halmashauri na Manispaa zote za Tanzania Bara ziliainishwa na kukopeshwa. Kwa ajili hiyo, jumla ya SACCOS 238 zilikopeshwa shilingi bilioni 1.19 hadi Desemba, 2010. Mfuko wa Dhamana wa Mradi wa Usawa wa Jinsia na Ajira Bora kwa Wanawake ulitoa jumla ya mikopo yenye thamani ya shilingi bilioni 1.23 kwa wajasiriamali 3,800 kupitia SACCOS za wanawake. Mfuko wa Uwezeshaji Wananchi Kiuchumi nao uliweza kutoa mikopo yenye thamani ya shilingi bilioni 45.44 ambapo wajasiriamali 72,113 walifaidika na SACCOS zipatazo 192 na vikundi vya uzalishaji mali na kiuchumi vipatavyo 86 vilifaidika na fedha hizo. Fursa nyingi za ajira zimezalishwa na mifuko hii, ndiyo maana ni sera ya Serikali kuiendeleza na kuongeza uwekezaji.

Ndugu Wananchi;

Tutaongeza fedha katika mifuko ya Serikali ili watu wengi zaidi wanufaike miaka ijayo. Aidha, tutaendelea kuboresha mazingira ili asasi za kutoa mikopo midogo ziongezeke, ziimarike na kunufaisha wengi. Hata hivyo, riba zinazotozwa na nyingi ya asasi hizi zinalalamikiwa kuwa kubwa mno kiasi cha kuwakwaza wakopaji. Badala ya juhudi zao kuwa za kujinasua na umaskini wanajikuta wanatumia muda wao mwingi na mapato yao mengi kuhangaikia kulipa riba ya mikopo. Nawaomba wenye asasi zinazokopesha wasikilize kilio hiki kwa moyo wa huruma. Waangalie viwango vya riba na taratibu za malipo. Mkopaji kulipa kila wiki hakumpi nafasi ya kujijenga na hivyo kushindwa kujikomboa na umaskini.

Wajasiriamali wa Kati na Wakubwa

Ndugu Rais wa TUCTA, Ndugu Wafanyakazi na Ndugu Wananchi;

Kwa upande wa wajasiriamali wa kati na wakubwa wa Kitanzania, tulielekeza nguvu zetu katika kuwajengea fursa na uwezo wa kukua. Tuliendeleza mifuko miwili maalum kwa ajili hiyo yaani Small and Medium Enterprises Credit Scheme na Export Guarantee Scheme. Aidha, kuanzia mwaka wa jana tulianza kuchukua hatua thabiti za kuijenga upya Benki ya Rasilimali ili irejee kufanya kazi ya benki ya uwekezaji kama ilivyokusudiwa ilipoanzishwa. Tuliipa mtaji wa shilingi bilioni 50 na tutafanya hivyo mwaka huu mpaka 2015. Dhamira yetu ni kuwapatia wawekezaji wazawa taasisi ya fedha itakayowawezesha kupata mikopo ya muda wa kati na mrefu. Kwa ajili hiyo wataweza kuwekeza katika shughuli za uzalishaji mali na huduma kama vile viwanda, mahoteli, kilimo, utalii, uchukuzi n.k.



Ndugu Wafanyakazi na Ndugu Wananchi;

Tayari watu wameanza kunufaika na mikopo hiyo na uwekezaji unaendelea na ajira zinazidi kuzalishwa. Dhamira yangu ni kuona sekta nyingi na wajasiriamali wengi zaidi wananufaika na mikopo kutoka Benki ya Rasilimali. Naamini juhudi hizi na zile ambazo tunazozielekeza kukuza kilimo zitaongeza sana ajira nchini katika miaka michache ijayo. Kwa upande wa kilimo, pamoja na mikopo inayotolewa sasa kupitia TIB, tunategemea kukamilisha uanzishaji wa Benki ya Kilimo katika mwaka ujao wa fedha.

Kuanzishwa kwa Benki hiyo itakuwa kichocheo kikubwa cha kuleta mapinduzi ya kilimo nchini. Kilimo ndiyo sekta inayowaajiri Watanzania wengi kuliko zote nchini ingawa watu hawaoni kama kujishughulisha na kilimo ni ajira. Hizi ni fikra potofu. Bahati mbaya sana vijana wengi hawapendi kujishughulisha na kilimo kwa sababu ya mazingira magumu ya kazi hiyo na kuwaachia wazee wao. Naamini mageuzi tunayoendelea kufanya chini ya mkakati wa Kilimo Kwanza yakisaidiwa na Benki ya Kilimo itakayoanzishwa yataibadili hali hiyo na kuvutia watu wengi pamoja na vijana kujishughulisha nayo.

Ajira Katika Soko la Pamoja

Ndugu Rais wa TUCTA, Ndugu Wafanyakazi,

Jumuiya ya Afrika Mashariki nayo inatoa fursa mpya za ajira kwa Watanzania. Utekelezaji wa Umoja wa Forodha umekuza mauzo ya Tanzania katika nchi wanachama na hivyo kuchochea uzalishaji na ajira kuongezeka nchini. Itifaki ya Soko la Pamoja la Afrika Mashariki iliyoanza kutumika tarehe 1 Julai, 2010 inafungua milango kwa bidhaa, mitaji, ajira na huduma kutoka nchi wanachama wa Jumuiya kutowekewa vikwazo vya kuvuka mipaka kwenda nchi nyingine.

Hatua hii inatoa fursa kwa Watanzania kuweza kupata ajira katika nchi za Kenya, Uganda, Rwanda na Burundi. Hivyo hivyo na watu wa nchi hizo nao watapata fursa ya kuajiriwa katika nchi yetu. Tulichokubaliana kwa upande wa ajira ni kuwa kila nchi itaainisha ajira inazofungua kwa watu wa nchi wanachama kuweza kuajiriwa. Zoezi hili limeanza na linaendelea hivi sasa.





Ndugu Zangu, Watanzania Wenzangu;

Hii ni fursa nzuri kwa Watanzania kupata ajira, tunachotakiwa kufanya ni kujipanga vizuri ili tunufaike na soko pana zaidi la ajira katika nchi hizo. Tunatakiwa kuangalia mitaala ya shule zetu na vyuo vyetu ili wahitimu wetu waweze kuwa na sifa za kupata ajira katika nchi za Afrika Mashariki. Kadhalika tuzingatie sifa nyingine muhimu za kufanya kazi kwa bidii, nidhamu na uaminifu. Naamini tunaweza kabisa kuwa hivyo na kufanya hivyo. Watanzania tunayo sifa ya kumudu magumu mengi hata changamoto hii nayo tutaikabili na kushinda.

Maslahi ya Wafanyakazi

Ndugu wafanyakazi,

Kilio chenu cha kuboreshewa mishahara na kupunguziwa kiwango cha kodi tumekipokea kwa uzito unaostahili. Jambo hili mlishalileta siku za nyuma na tumechukua hatua, tunaendelea na tuaendelea kuchukua hatua. Tangu tuingie madarakani, Serikali yetu imekuwa inachukua hatua za makusudi za kuboresha mishahara ya watumishi wa umma na wale wa sekta binafsi. Kwa mfano, kima cha chini cha mshahara kwa watumishi wa umma kimeongezeka kutoka shilingi 65,000 kwa mwezi mwaka 2006 hadi kufikia shilingi 135,000 kwa mwezi mwaka 2010. Hii ni sawa na ongezeko la asilimia 107.

Aidha, tumekuwa tunaboresha mishahara ya kada mbalimbali za utumishi wa umma kwa makundi yao. Hatua hizi zimepunguza kasi ya watumishi wa umma katika baadhi ya kada kuhamia sekta binafsi na hata wale waliohama kurudi. Mkakati huo tutauendeleza kwa kada ambazo hatujazifikia bila kusahau wale tuliokwishawafikia kuwaboresha zaidi.

Ndugu Rais wa TUCTA na Ndugu Wafanyakazi;

Kwa upande wa sekta binafsi, hatua yetu ya kuhakikisha kuwa Bodi za Mishahara za Kisekta zinaundwa na kufanya kazi imeanza kuzaa matunda. Kima cha chini kimepanda kutoka shilingi 48,000/= kwa mwezi hadi shilingi 80,000/= mpaka shilingi 300,000/= kutegemea na aina ya shughuli afanyayo mwajiri.

Vile vile, katika miaka mitano hii, kodi ya mapato imepunguzwa kutoka asilimia 18.5 hadi asilimia 14 na VAT imeshuka kutoka asilimia 20 hadi asilimia 18. Hatua zote hizo zimeleta nafuu ya kiasi fulani.

Ndugu Rais wa TUCTA, Ndugu Wafanyakazi;

Pamoja na hatua hizo bado mishahara ya wafanyakazi nchini ni midogo ukilinganisha na gharama za maisha. Tunatambua hoja na haja ya kuendelea kuongeza mishahara mwaka hadi mwaka mpaka tufikie pale tunapotaka sote tufike, yaani mshahara wa kumudu gharama za maisha.

Napenda kuwahakikishia kuwa hakuna upungufu wa dhamira wala utashi wa kisiasa wa kufanya hivyo, kwa upande wangu binafsi au wa wenzangu Serikalini. Yale tuliyoyafanya katika miaka mitano iliyopita ni uthibitisho tosha wa ukweli huo. Ahadi ninayopenda kurudia tena leo ni kuwa tutaiendeleza kazi tuliyoianza mwaka hadi mwaka. Hata hivi sasa katika mchakato unaoendelea wa kutayarisha bajeti ya mwaka ujao wa fedha, wahusika wanaangalia namna ya kupandisha kima cha chini cha mashahara na nafuu nyinginezo.

Ndugu Rais wa TUCTA, Ndugu Wafanyakazi;

Uwezo wa kimapato wa Serikali ndiyo kikwazo kinachotupunguzia kasi ya kuboresha mishahara ya watumishi wa umma. Wakati wote tumekuwa tunajikuta tupo katika mtihani kuhusu kuweka uwiano mzuri baina ya matumizi ya mishahara na matumizi kwa ajili ya shughuli nyinginezo za Serikali. Busara inaelekeza kuwa kiasi cha fedha zinazotumika kulipa mishahara kisiwe kikubwa mno na kubakiza kiasi kidogo kwa ajili ya Serikali kutekeleza majukumu yake mengine ya utawala, ulinzi na usalama, maendeleo na utoaji wa huduma muhimu kwa wananchi wake.

Changamoto kubwa tuliyonayo ni jinsi ya kuongeza zaidi mapato ya Serikali ili tuwe na fedha za kutosha kuwalipa wafanyakazi mishahara inayokidhi gharama za maisha na kubaki na pesa nyingi zaidi kwa Serikali kuendesha shughuli zake na kuhudumia wananchi wake. Katika miaka mitano iliyopita tumefanya juhudi kubwa ya kuongeza mapato ya Serikali na tumepata mafanikio yanayotia moyo. Mapato yameongezeka kutoka wastani wa shilingi bilioni 177.1 kwa mwezi mwaka 2005 hadi shilingi bilioni 390.7 kwa mwezi mwaka 2010.

Ndugu Rais wa TUCTA, Ndugu Wafanyakazi;

Mafanikio hayo ndiyo yaliyotuwezesha kuongeza mishahara kwa kiasi tulichofikia sasa. Hivyo basi, jawabu la tatizo lipo katika kuongeza zaidi mapato ya Serikali. Hiyo ndiyo dhamira yetu na tumejipanga kimkakati kufanya hivyo. Ndiyo maelekezo yangu ya msingi niliyoyatoa kwa wenzetu wa Wizara ya Fedha na Mamlaka ya Mapato nilipowatembelea mwezi Februari, 2011. Kinachotakiwa ni wafanyakazi wenzetu katika asasi hizo kufanya kazi kwa bidii na uaminifu na walipa kodi kuwapa ushirikiano.

Ndugu Rais wa TUCTA;

Nafurahi kwamba katika risala yenu mmetoa mawazo mengi mazuri kuhusu namna ya kuongeza mapato ya Serikali, kubana matumizi na kuboresha mishahara ya wafanyakazi. Mawazo yenu yanashabihiana sana na mawazo yetu na baadhi ya mambo tunayofanya na tunayoyafikiria kuyafanya katika kuboresha mapato ya Serikali na maslahi ya watumishi wa umma. Tupeni nafasi tukayafanyie kazi.

Ndugu Rais wa TUCTA, Ndugu Wafanyakazi;

Nimeagiza pia kuwa Serikali yetu ianze kufikiria mambo mbalimbali yatakayowanufaisha wafanyakazi na kuinua hali zao za maisha. Hususan nimeagiza tuangalie uwezekano wa wafanyakazi kupata mikopo ya gharama nafuu watakayoitumia kununua au kujenga nyumba au kununua vyombo vya usafiri au vyombo vya nyumbani. Tumekuwa tunatoa mikopo kwa Waheshimiwa Wabunge, sasa tufanye hivyo kwa watumishi wa Serikali nao. Nafurahi kuwa Azimio la kuanzisha mfuko wa mikopo ya watumishi wa umma lilipitishwa na Bunge katika kikao kilichopita.

Vile vile, nimeagiza tutoe kipaumbele kwa ujenzi wa nyumba za kuishi watumishi wa umma hasa wale wa vijijini na vyombo vya ulinzi na usalama ili tuboreshe mazingira yao ya kazi. Ni kazi ambayo tunaifanya hivi sasa ila tunataka tuipe msukumo mkubwa zaidi.

Wafanyakazi wa Sekta Binafsi

Ndugu Rais wa TUCTA, Ndugu Wafanyakazi;

Kwa upande wa wafanyakazi katika sekta binafsi, tutaendelea kusimamia Mabaraza ya Mishahara ya Kisekta ili yafanye kazi zake ipasavyo na kuhakikisha kwamba maslahi ya watumishi katika sekta hiyo yanaboreshwa. Kwa hatua tulizokwishazichukua tangu yaundwe, mafanikio yake yameanza kuonekana. Hata hivyo, wafanyakazi wangeweza kunufaika zaidi. Naambiwa kwamba wafanyakazi wengi katika sekta binafsi wapo katika mazingira magumu. Wapo wengi ambao ni vibarua wa kutwa na wengine wako hivyo kwa maisha yao yote. Aidha, wanapata ujira mdogo.

Waajiri wanakwepa wajibu wao stahiki kwa wafanyakazi wao ambao ndiyo wanaofanya watajirike. Kuwasaidia wafanyakazi kudai na kupata haki zao ni moja ya agenda muhimu za Serikali yetu. Naomba vyama vya wafanyakazi na wafanyakazi tusaidiane na kushirikiana katika jambo hili. Haya ni mapambano yetu sote. Tukishirikiana na kusaidiana tutashinda.

Kuboresha Pensheni/Malipo ya Uzeeni

Ndugu Rais wa TUCTA, Ndugu Wafanyakazi,

Nawashukuru sana kwa maneno yenu ya pongezi kuhusu hatua tulizochukua juu ya kurekebisha na kuboresha mafao ya wanachama wa mifuko ya hifadhi ya jamii. Nami nafurahi kwamba, lile tatizo la mafao ya wafanyakazi wa Chuo Kikuu cha Dar es Salaaam waliokuwa katika mfumo wa SSSS tumelipatia ufumbuzi. Wafanyakazi hao sasa wameingizwa katika mfumo wa PPF kama wenzao wengine. Kwa ajili hiyo Serikali italipa shilingi bilioni 9.46 kufidia michango ambayo haikuwahi kulipwa ili ndugu zetu hawa waweze kulipwa mafao yao chini ya mfumo wa PPF.

Jambo la pili ni kuwa nafurahi Mamlaka ya Usimamizi na Udhibiti wa Mifuko ya Hifadhi ya Jamii imekwishaundwa na imekwishaanza kazi. Tena wameanza vizuri. Kupitia mamlaka hii sasa masuala yahusuyo afya ya mifuko, uwianishaji wa mafao baina ya mifuko na uboreshaji wa mafao yatapatiwa ufumbuzi wa uhakika na kwa wakati. Chombo hiki ni kipya, lazima tukiunge mkono. Sisi katika Serikali tutaendelea kutimiza wajibu wetu wa kukilea. Naomba vyama vya wafanyakazi na mifuko ya hifadhi kukipa ushirikiano unaostahili ili kiweze kufanikisha majukumu yake ipasavyo.

Kuhusu mchakato wa Katiba, napenda kuwahakikishia kuwa hakuna atakayebaguliwa. Tunataka watu wote wapate fursa ya kushiriki. Jipangeni kushiriki kwa ukamilifu. Tusiruhusu watu wachache wanaotaka kuhodhi mjadala huu kwa kutaka maoni yao tu ndiyo yasikilizwe na kuwazuia wengine wasitoe maoni yao. Tukiruhusu tabia hiyo huenda tusipate Katiba ambayo itawakilisha maoni ya wengi bali kikundi fualni kilicho hodari kupiga kelele bila hoja.

Hitimisho

Ndugu Rais wa TUCTA, Ndugu Viongozi wa Vyama vya Wafanyakazi na Ndugu Wafanyakazi;

Nimezungumza kwa muda mrefu. Nimejitahidi katika hotuba yangu kutoa maelezo ya ufafanuzi kwa takriban kila jambo lililotajwa katika risala yenu. Yapo baadhi ambayo sikuyazungumzia lakini siyo kwamba nimeyapuuza. Kila jambo mlilolitaja tutalifanyia kazi. Nia yetu ni kujenga nchi yetu na katika kufanya hivyo natambua kuwa wafanyakazi ni mhimili muhimu sana. Ni wajibu wetu kuwasikiliza, ni wajibu wetu kushirikiana nanyi na ni muhimu kushughulikia musuala yenu ipasavyo. Kila mmoja wetu anamuhitaji mwenzake. Narudia tena kuwahakikishia ushirikiano wangu binafsi na ule wa wenzangu wote Serikalini wakati wote.

Naomba nimalize kwa kusema kuwa kwa ushirikiano na mshikamano baina ya utatu wetu, yaani Wafanyakazi, Waajiri na Serikali hakuna litakalotushinda na hakuna mfanyakazi wa Tanzania atakayekuwa mtumwa katika nchi yake.

Nawashukuru tena viongozi wa TUCTA kwa kunialika kwenye sherehe hizi muhimu. Hongereni kwa sherehe zilizofana sana.

Mungu Ibariki Afrika!

Mungu Ibariki Tanzania !

Asanteni kwa Kunisikiliza.

MAKATIBU NA MANAIBU MAKATIBU WAPYA WATAJWA!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amefanya uteuzi wa Katibu Mkuu mmoja wa Wizara, na Naibu Makatibu Wakuu 10 wa Wizara mbalimbali.

Aidha, Rais Kikwete amemhamisha Naibu Katibu Mkuu mmoja kutoka Wizara moja kwenda nyingine.

Taarifa iliyotolewa Ikulu, Dar es Salaam, leo, Jumatano, Aprili 27, 2011, na Kaimu Katibu Mkuu Kiongozi Bwana George Yambesi inasema kuwa uteuzi huo wa maofisa hao waandamizi wa Serikali unaanzia Alhamisi iliyopita, Aprili 21, mwaka huu, 2011, na wataapishwa Jumamosi wiki hii, Aprili 30, saa sita mchana.

Taarifa hiyo inasema kuwa katika uteuzi huo, Rais Kikwete amemteua aliyekuwa Naibu Katibu Mkuu Wizara ya Ulinzi na Jeshi la Kujenga Taifa, Bwana Job D. Masima kuwa Katibu Mkuu wa Wizara hiyo.

Aidha, Mheshimiwa Rais wa Jamhuri ya Muungano wa Tanzania amemhamisha Injinia Mbogo Futakamba aliyekuwa Naibu Katibu Mkuu Wizara ya Maji kwenda Wizara ya Kilimo, Chakula na Ushirika.

Taarifa hiyo inasema kuwa Naibu Makatibu Wakuu walioteuliwa na Mheshimiwa Rais ni kama ifuatavyo:

* Bwana Aphayo Kidata ameteuliwa kuwa Naibu Katibu Mkuu Ikulu. Kabla ya uteuzi wake, Bwana Kidata alikuwa Mkurugenzi wa Sera na Mipango katika Wizara ya Ardhi, Nyumba na Maendeleo ya Makazi.

* Bwana Hab Mkwizu ameteuliwa kuwa Naibu Katibu Mkuu Menejimenti ya Utumishi wa Umma. Kabla ya uteuzi wake, Bwana Mkwizu alikuwa Karani wa Baraza la Mawaziri.

* Bwana Charles Amos Pallangyo ameteuliwa kuwa Naibu Katibu Mkuu Ofisi ya Waziri Mkuu. Kabla ya uteuzi wake, Bwana Pallangyo alikuwa Mkurugenzi wa Uratibu – Ofisi ya Waziri Mkuu.

* Bibi Mwamini Juma Malemi ameteuliwa kuwa Naibu Katibu Mkuu katika Wizara ya Mambo ya Ndani ya Nchi. Kabla ya hapo alikuwa Msaidizi wa Makamu wa Rais katika masuala ya Maendeleo ya Jamii na Uratibu wa Malalamiko ya Jamii na Uratibu wa Malalamiko ya Wananchi.

* Injinia Mussa Ibrahim Iyombe ameteuliwa kuwa Naibu Katibu Mkuu katika Wizara ya Ulinzi na JKT. Kabla ya uteuzi huo alikuwa Mkurugenzi wa Miundombinu ya Usafiri katika Wizara ya Ujenzi.

* Injinia Dkt. John Stanslaus Ndunguru ameteuliwa kuwa Naibu Katibu Mkuu katika Wizara ya Ujenzi. Kabla ya hapo, alikuwa Mkurugenzi wa Huduma na Ufundi katika wizara hiyo hiyo ya Ujenzi.

* Bwana John Thomas James Mngodo ameteuliwa kuwa Naibu Katibu Mkuu katika Wizara ya Uchukuzi. Kabla ya uteuzi wake alikuwa Mkurugenzi wa Usalama wa Chakula.

* Bibi Anna T. Maembe ameteuliwa kuwa Naibu Katibu Mkuu katika Wizara ya Maendeleo ya Jamii, Jinsia na Watoto, Kabla ya uteuzi wake, Bibi Maembe alikuwa Mkurugenzi wa Mazingira na Habari wa NEMC.

* Bibi Sihaba Nkinga ameteuliwa kuwa Naibu Katibu Mkuu katika Wizara ya Habari, Vijana, Utamaduni na Michezo. Kabla ya hapo alikuwa Mkurugenzi wa Sera na Mipango katika Wizara ya Uchukuzi.

* Injinia Bashir J. Mrindoko ameteuliwa kuwa Naibu Katibu Mkuu katika Wizara ya Maji. Kabla ya uteuzi wake, Bwana Mrindoko alikuwa Kamishna wa Nishati na Mafuta ya Petroli.

CLEMENT MSHANA MKURUGENZI MPYA TBC!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amemteua Bwana Clement Senzota Mwete Mshana kuwa Mtendaji Mkuu wa Shirika la Utangazaji Tanzania (TBC).

Taarifa iliyotolewa Ikulu, Dar es Salaam, leo, Jumatano, Aprili 27, 2011, na Kaimu Katibu Mkuu Kiongozi, Bwana George Yambesi inasema kuwa uteuzi huo unaanzia Alhamisi iliyopita, Aprili 21, mwaka huu, 2011.

Kabla ya uteuzi huo, Bwana Clement Senzota Mwete Mshana alikuwa Mkurugenzi wa Idara ya Habari (Maelezo).

Bwana Mshana anachukua nafasi iliyoachwa wazi na Bwana Dunstun Tido Mhando ambaye amemaliza muda wake wa utumishi kwa mujibu wa mkataba wake.

RAIS KIKWETE AKUTANA NA VIONGOZI WA WAFANYAKAZI IKULU!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete Jumatano, Aprili 20, 2011, amekutana na kufanya mazungumzo na viongozi wa vyama vya wafanyakazi nchini.

Mkutano huo wa kawaida kati ya Rais Kikwete na vikundi mbalimbali vya jamii kikiwemo kile cha viongozi wa wafanyakazi umefanyika Ikulu, Dar es Salaam katika mazingira ya kuelewana.

Mkutano huo umechukua kiasi cha saa tano na kuhudhuriwa na viongozi 20 wa wafanyakazi, mawaziri wanaohusika na masuala na haki za wafanyakazi na watumishi wengine waandamizi wa Serikali.

Viongozi wao wakiongozwa na Rais wa Shirikisho la Vyama vya Wafanyakazi Tanzania (TUCTA), Bwana Ayoub Omar Jumaa umeshirikisha viongozi kutoka TUCTA yenyewe, Chama cha Walimu Tanzania (CWT), TPWU, TEWUTA, DOWUTA, TRAWU, CHODAWU, TUICO, TASU, TAMICO TUGHE na COTWU.

Mawaziri waliohudhuria mkutano huo ni pamoja na Waziri wa Kazi na Ajira, Mheshimiwa Gaudencia M. Kabaka, Waziri wa Ofisi ya Rais, Menejimenti ya Utumishi Umma, Mheshimiwa Hawa A. Ghasia na Waziri wa Nchi, Ofisi ya Waziri Mkuu (TAMISEMI) Mheshimiwa George Huruma Mkuchika.

Katika kikao hicho, pande hizo mbili zimejadili masuala mengi yanayohusu haki na maslahi ya wafanyakazi na masuala mengine muhimu ya taifa yakiwamo madai ya malimbikizo ya malipo ya wafanyakazi ikiwamo mishahara.

Rais Kikwete na viongozi hao pia wamejadili kuhusu uwezekano wa Serikali kuongeza mishahara ya watumishi kwa kuzingatia upandaji wa gharama za maisha, uwakilishi wa wafanyakazi katika mchakato wa kuandaa Katiba Mpya ya Jamhuri ya Muungano wa Tanzania, na uwezekano wa Serikali kupunguza kodi kwa wananchi ili kutoa ahueni zaidi ya maisha kwa wananchi.

Kuhusu sera ya Serikali ya kupunguza kodi ili kutoa ahueni ya maisha kwa wananchi, Rais Kikwete amewaambia viongozi hao wafanyakazi: “Hili tulikwishakubaliana kuwa lazima tuchukue hatua za mara kwa mara kuongeza unafuu wa maisha kwa wananchi wetu. Tutaendelea nalo hili kwa sababu ni muhimu sana. Suala kubwa hapa ni kutekeleza sera ya kupunguza ukali wa maisha kwa wananchi. Lazima tufanye kila liwezekanalo kufanikisha hili.”

Kuhusu ombi la viongozi hao kuwa Serikali itoe dhamana kwa Shirika la Simu Tanzania (TTCL) ili kuliwezesha shirika kuwa na uwezo wa kukopa fedha katika mabenki kusaidia kuliimarisha, Rais Kikwete ameigiza Wizara ya Fedha kuchukua hatua za haraka kuhakikisha hili linafanikiwa. “Tulifanye hili haraka sana, halina sababu ya kucheleweshwa kwa sababu TTCL ni shirika muhimu sana.”

WENGER HAJAKATA TAMAA YA UBINGWA WAKATI CHELSEA IKICHUKUA NAFASI YA PILI!!

Kocha Mkuu wa Arsenal Arsene Wenger a,esema wataendelea kupigia Ubingwa hadi hatua mwisho licha ya kuambulia sare ya magoli 3-3 dhidi ya Tottenham Hotspurs!!! Mabingwa Watetezi Chelsea wamejikita katika nafasi ya Pili baada ya ushindi wa magoli 3-1 dhidi ya Birmingham City!!

MADRID MABINGWA WA COPA DEL REY KWA KUIFUNGA BARCELONA!!

Goli la Kichwa lililofungwa na Cristiano Ronaldo katika mchezo wa Fainal ya Kombe la Mfalme nchini Sapin lilitosha kuwapa Ubingwa Real Madrid na kuwanyang'anya taji Barcelona!! Goli hilo lilifungwa katika muda wa nyongeza za dakika thelathini baada ya dakika tisini timu hizo kutoshana nguvu!!

INTER MILAN WATEMA KOMBE, MADRID WAKIWAFUATA BARCELONA!!

Mabingwa Watetezi wa Ligi ya Mabingwa Barani Ulaya, Inter Milan jana wameondolewa kwenye mashindano baada ya kukubali kichapo kutoka kwa Schalke 04 kwa magoli 2-1!! Real madrid wenye wametinga nusu fainal baada ya kuwafunga Tottenham Hotspurs kwa goli 1-0!!

MANCHESTER UNITED YAZIMA NDOTO ZA CHELSEA!!

Ndoto za Chelsea kufuzu kwenye Nusu Fainal ya Ligi ya Mabingwa Bara Ulaya zimeyeyuka kwenye Uwanja wa Old Traford baada ya kukubali kipigo kingine cha magoli 2-1 kutoka Manchester United!! Kwa matokeo hayo Chelsea hawana chao kwenye Ligi ya Mabingwa Barani Ulaya Msimu huu baada ya kuondoshwa kwenye mashindano!!

MAN CITY MAJI YAZIDI UNGA MBELE YA LIVERPOOL!!

Klabu ya Liverpool, Vijogoo Vya Jiji jana walifanikiwa kuibuka na ushindi mnono wa magoli 3-0 mbele ya Manchester City ikiwa ni kulipiza kisasi cha mchezo wa kwanza!! Ushindi huo umerejesha matumaini kwa Liverpool kufanya vizuri kwenye michezo iliyobakia!!!

MAN UTD, BARCELONA ZAWEKA HAI MATUMAINI YA KUTINGA NUSU FAINAL!!

Goli la pekee la Mshambuliaji wa Kimataifa wa Uingereza Wayne Rooney limetosha kuwapa ushindi wa ugenini Manchester United katika mchezo wa Kwanza wa Ligi ya Mabingwa Barani Ulaya mbele ya Chelsea. Barcelona kwa upande wao wametoa kipigo kizito kwa Shakhtar Donetsk cha magoli 5-1!!!

INTER MILAN, TOTTENHAM WASHIKWA PABAYA LIGI YA MABINGWA!!

Mabingwa Watetezi wa Ligi ya Mabingwa Barani Ulaya Inter Milan imeanza vibaya hatua ya Robo Fainal baada ya kupata kichapo kutoka kwa Schalke 04 wakiwa San Siro baada ya kufungwa magoli 5-2 huku Real Madrid wakitumia vyema Uwanja wa nyumbani kwa kuifunga Tottenham Hotspurs kwa magoli 4-0!!

RWEGASIRA WA TRAWU KUZIKWA LEO IKULU YATUMA RAMBIRAMBI!!

Rais wa Jamhuri ya Muungano wa Tanzania, Mhe. Dkt. Jakaya Mrisho Kikwete amemtumia salamu za rambirambi Waziri wa Uchukuzi, Mheshimiwa Omar Nundu kufuatia kifo cha ghafla cha Sylvester Rwegasira, aliyekuwa Katibu Mkuu wa Chama Cha Wafanyakazi wa Reli Tanzania (TRAWU) kilichotokea tarehe 4 Aprili, 2011 kutokana na maradhi ya moyo.

Rais Kikwete amesema kuwa kifo cha Sylvester Rwegasira kimeleta simanzi kubwa siyo kwa familia yake tu, bali pia jumuiya ya wafanyakazi hapa nchini kwani Marehemu Sylvester alikuwa mtetezi mkubwa wa wafanyakazi hususan wale wa Reli ambao yeye alikuwa Katibu Mkuu wa Chama chao, kwani alijitoa kwa moyo wake wote kutetea maslahi yao.

Kupitia kwa Waziri wa Uchukuzi, Rais Kikwete ametoa pole nyingi kwa familia ya Marehemu Sylvester Rwegasira kwa kupotelewa na kiongozi muhimu wa familia, hivyo anamuomba Mwenyezi Mungu, Mwingi wa Rehema aiweke mahali pema peponi roho ya Marehemu Rwegasira.

Wakati huo huo, Rais Kikwete amewaomba wanafamilia ya Marehemu Rwegasira kuwa watulivu, wavumilivu na wenye subira katika kipindi hiki kigumu cha maombolezo ya mpendwa wao, huku akiwahakikishia kuwa yeye binafsi yuko pamoja nao katika muda wote wa maombolezo ya Marehemu Sylvester Rwegasira.

UN YAMWAGA SIFA KWA UONGOZI WA AWAMU YA NNE!!

Umoja wa Mataifa (UN) umeipongeza Serikali ya Tanzania na uongozi wa Rais Jakaya Mrisho Kikwete kwa mafanikio makubwa ya kupunguza vifo vya vitoto vichanga vinavyozaliwa na ugonjwa wa ukimwi na pia kupunguza vifo vya akinamama wajawazito kutokana na ugonjwa huo.

Umoja huo umesema kuwa kwa kasi ya sasa inawezekana Tanzania ikamaliza kabisa vifo vya watoto kutokana na ugonjwa huo katika miaka mitatu minne kama hali haitabadilika kwa namna yoyote ile.

Aidha, Umoja huo umemwomba Rais Kikwete kuongoza kampeni ya kutaka uhamisho wa teknolojia ya kutengeneza na kuzalisha dawa za kurefusha maisha ya watu wanaoishi na virusi vya ukimwi kutoka nchi tajiri ili zizalishwe katika nchi zinazoendelea.

Pongezi hizo kwa Tanzania na kwa uongozi wa Rais Kikwete zimetolewa Jumatatu, Aprili 4, 2011, na Naibu Katibu Mkuu wa UN, Mheshimiwa Asha Rose Migiro, akifuatana na Mkurugenzi Mkuu wa Shirika la Ukimwi la Umoja wa Mataifa (UNAIDS), Mheshimiwa Michel Sidibe, wakati walipokutana na Rais Kikwete Ikulu, Dar es Salaam.

“Tunatambua na kuthamini sana maendeleo makubwa yaliyopatikana katika Tanzania chini ya uongozi wa Serikali katika utekelezaji wa Lengo la Sita la Maendeleo ya Milenia (MDG). Umepunguza vifo vya vichanga vinavyozaliwa na virusi vya ukimwi hadi kufikia watoto saba tu kila siku na katika miaka mitatu ama minne mnaweza kabisa kufikia ziro,” amesema Mama Asha Rose Migiro ambaye ameongoza ujumbe wa UN kuja kumwona Rais Kikwete.

MDG ya sita inaelekeza kupambana na ukimwi, malaria na maradhi mengine duniani na lengo ni kupunguza vifo kutokana na magonjwa hayo kwa angalau nusu, kusimamisha kuenea kwa magonjwa na kuanza kubadilisha mwelekeo wa magonjwa hayo ifikapo mwaka 2015.

Ameongeza Mama Migiro ambaye alikuwa Waziri wa Mambo ya Nje na Ushirikiano wa Kimataifa wa Tanzania kabla ya kuteuliwa kushika nafasi hiyo ya UN:

“Tanzania, chini ya uongozi wako, imepata mafanikio makubwa sana katika kupunguza maambukizi, kujali na kutunza waathirika na kuwapatia dawa za kurefusha maisha yao. Uongozi wako katika hili umekuwa imara na mzuri sana.”

Naye Mheshimiwa Sidibe amemwomba Rais Kikwete kuongoza kampeni ya kuhakikisha kuwa dawa za viwango vyote vya kupambana na ukimwi zinaanza kutengenezwa na kuzalishwa katika nchi zinazoendelea badala ya kutengenezwa katika nchi tajiri zinazoweka masharti makubwa katika kuruhusu dawa hizo kutengenezwa kwa bei rahisi zaidi katika nchi masikini.

“Mheshimiwa Rais tunakuomba uwe sauti yetu, tunakuomba uongoze msukumo mpya wa kutaka nchi masikini nazo ziwe na teknolojia ya kutengenezwa dawa bora zaidi za kukabiliana na ukimwi. Kama hatutaweza kuzizalisha dawa hizi kwenye nchi zetu itafikia mahali hata watu milioni tano wanapata dawa hizo katika Afrika wakajikuta hawapati dawa siku moja,” Mheshimiwa Sidibe amemwambia Rais Kikwete.

HOTUBA YA MWEZI KUTOKA KWA MKUU WA KAYA!!

HOTUBA YA MHE. JAKAYA MRISHO KIKWETE,
RAIS WA JAMHURI YA MUUNGANO WA TANZANIA,
KWA WANANCHI, TAREHE 31 MACHI, 2011
Ndugu Wananchi;
Kwa mara nyingine tena naomba tuanze kwa kumshukuru Mwenyezi Mungu mwingi wa rehma kwa kutujaalia uhai na kutuwezesha kuwasiliana kwa utaratibu wetu wa kuzungumza kwa njia hii kila mwisho wa mwezi. Leo nina mambo matatu. La kwanza, linahusu shughuli niliyoifanya mwezi huu tunaoumaliza leo ya kutembelea Wizara na Idara za Serikali. Jambo la Pili ni kuhusu taarifa ya Mdhibiti na Mkaguzi Mkuu wa Hesabu za Serikali. Na jambo la tatu ni kuhusu mchakato wetu wa Katiba Mpya.

Ziara za Wizara
Ndugu Wananchi;

Kuanzia tarehe 15 Machi, 2011 nimekuwa nikifanya ziara ya kutembelea Wizara za Serikali na baadhi ya Taasisi zilizo chini ya Wizara hizo. Madhumuni ya ziara hizo ni kufanya mambo matatu: Kwanza, kupata taarifa ya utekelezaji wa majukumu ya Wizara pamoja na utekelezaji wa Ilani ya Uchaguzi ya CCM ya 2005 hadi 2010 na maagizo mbalimbali niliyotoa kwa Wizara miaka mitano iliyopita. Pili, ni kupata taarifa kuhusu jinsi Wizara zilivyojipanga kutekeleza majukumu yake na Ilani ya Uchaguzi ya CCM ya 2010 – 2015. Na tatu, kutoa maelekezo maalum kwa mambo mbalimbali ninayotaka Wizara zifanye.

Ndugu Wananchi;
Mpaka sasa, nimekwishatembelea Wizara 14 na taasisi tatu za Serikali, yaani Mamlaka ya Mapato (Idara ya Forodha), Bandari ya Dar es Salaam na Wakala wa Taifa wa Hifadhi ya Chakula. Pia, nimeonana na kuzungumza na Mawakala wa Forodha. Kwa jumla ziara zangu zilikuwa nzuri na malengo niliyojiwekea yametimia. Nimefarijika sana kuona na kusikia mafanikio makubwa yaliyopatikana katika utekelezaji wa majukumu ya Wizara, Ilani ya Uchaguzi ya CCM ya 2005 – 2010 na maagizo niliyoyatoa miaka mitano iliyopita. Aidha, nimeridhishwa na jinsi Wizara na Taasisi zao zilivyojipanga kutekeleza majukumu yao na Ilani ya Uchaguzi ya 2010 – 2015.

Ndugu Wananchi;
Pamoja na changamoto zilizojitokeza na zilizopo, malengo mengi sana tuliyojiwekea yametimia. Narudia kutoa pongezi za dhati kwa kazi kubwa na nzuri iliyofanyika na inayoendelea kufanyika. Upo upungufu katika baadhi ya maeneo ambao unahitaji kusahihishwa. Sina shaka kabisa kuwa kwa mipango iliyopo na ari niliyoiona ya utekelezaji katika Wizara na taasisi nilizozitembelea kasoro hizo zitarekebishwa.

Mapato na Matumizi ya Serikali
Ndugu Wananchi;
Napenda kutumia nafasi hii kuzungumzia baadhi ya mambo niliyoyaona au kujitokeza katika ziara zangu hizo. Kwa kuanzia, naomba kuzungumzia suala la mapato na matumizi ya Serikali. Hali ya ukusanyaji wa mapato inaendelea vizuri hasa kuanzia Januari, 2011. Miezi sita ya mwanzo ya mwaka huu wa fedha (Julai – Desemba, 2010) makusanyo ya mapato ya Serikali yalikuwa chini ya lengo kwa asilimia 8.

Makusanyo katika Idara ya Kodi ya Ongezeko la Thamani (VAT) ndiyo yaliyokuwa chini zaidi. Narudia kuwahimiza na kuwatia moyo ndugu zetu wa TRA na Hazina waendelee na kazi nzuri waifanyayo na kuyapatia ufumbuzi matatizo yaliyojitokeza. Niliambiwa kuwa moja ya sababu ya kuwepo matatizo kwa upande wa VAT ni mpango mpya unaowataka wafanyabiashara kutumia mashine maalum za kielektroniki za kutolea risiti na kuhifadhi kumbukumbu za mauzo (Electronic Fiscal Devices – EFD). Mashine hizo zinapotumika kodi ya Serikali hujulikana kwa uhakika hivyo ni rahisi kuifuatilia kwa wafanyabiashara. Kila risiti inapotolewa taarifa hupatikana TRA moja kwa moja, hivyo si rahisi kukwepa kodi. Mashine hizo bado hazijaenea kote na baadhi ya wafanyabiashara hawazipendi, ndiyo maana kuna matatizo kwenye makusanyo ya VAT.

Ndugu Wananchi;
Napenda kutumia nafasi hii kutoa maombi matatu: Ombi la kwanza ni kwa wafanyabiashara. Nawaomba watoe ushirikiano kwa TRA kwa kutumia mashine hizo. Ni utaratibu utakaowaondolea usumbufu wanaoulalamikia wafanyabiashara kuhusu baadhi ya maofisa waonevu au wasiokuwa waaminifu na waadilifu. Kama kuna malalamiko yoyote kuhusu utekelezaji wa mpango huu, wawaone viongozi wa TRA au hata wa Wizara ya Fedha. Nawasihi viongozi wa TRA nao kutengeneza utaratibu mzuri wa kuwasikiliza wafanyabiashara ili yale matatizo yanayowakabili wayatatue. Aidha, waharakishe taratibu za upatikanaji wa mashine hizo na kutafuta njia za kuwasaidia wafanyabishara wadogo waweze kumudu kuzipata. Ningependa jambo hili lifanyike haraka ili utekelezaji wa mpango huu mzuri uende kwa kasi nzuri. Hilo ndilo ombi langu la pili.

Ndugu Wananchi;
Ombi la tatu ni kwa wananchi wenzangu kudai kupewa risiti kwa kila manunuzi wanayoyafanya dukani. Naomba mtambue kuwa kila unaponunua kitu dukani umeshalipa kodi. Hivyo basi unapoacha kudai risiti pesa ile ya kodi umemuachia mfanyabiashara na unainyima Serikali yako mapato ambayo ikiyapata yanaiongezea uwezo wa kuwahudumia wananchi wake pamoja na wewe.
Tafadhalini sana, msikubali kuwaacha wafanyabiashara wanufaike badala ya wananchi walio wengi. Nawaomba Watanzania wenzangu tukumbuke kuwa kulipa kodi au kusaidia kodi kulipwa ni wajibu wa msingi wa raia na ni kitendo cha uzalendo wa hali ya juu. Kufanya kinyume chake ni kukosa moyo wa uzalendo na kuvunja sheria. Raia mwema ni mlipa kodi mzuri na husaidia kuzuia watu wengine anaowajua au anaowaona wasikwepe kulipa kodi. Nawaomba sote: wafanyabiashara na raia tutimize ipasavyo wajibu wetu huo. “Inawezekana. Kila mtu atimize wajibu wake!”

Nidhamu ya Matumizi
Ndugu Wananchi;
Juhudi za kuongeza mapato ya Serikali zitakuwa na maana iwapo kutakuwa na matumizi mazuri ya fedha za Serikali. Jambo hili nimekuwa nalisisitiza mara kwa mara na nililirudia tena nilipozungumza na viongozi na wafanyakazi wa Wizara ya Fedha na Wizara ya Tawala za Mikoa na Serikali za Mitaa.
Niliwakumbusha wajibu wao wa kuhakikisha kuwa fedha na mali za umma zinatumiwa vizuri na kwamba sheria na kanuni za manunuzi ya umma zinazingatiwa katika Serikali Kuu, Serikali za Mitaa na Mashirika ya Umma. Aidha, niliwakumbusha kuwa wasichelee kuwachukulia hatua wale wote wanaofanya vitendo vya wizi, ubadhirifu wa mali za umma na kukiuka sheria na kanuni za fedha na manunuzi ya umma.

Maslahi ya Watumishi
Ndugu Wananchi,
Nilipokuwa Wizara ya Utumishi, nilisisitiza suala zima la kuboresha utendaji wa watumishi wa umma nchini pamoja na umuhimu wa kuendelea kuboresha maslahi na mazingira ya kazi ya watumishi hao. Aidha, niliwataka wahakikishe kuwa ucheleweshaji uliotokea safari hii kuhusu ajira ya walimu waliokwishahitimu mafunzo yao vyuoni haujirudii tena. Niliwaelekeza wakae mapema na wenzao wa Hazina, Wizara ya Elimu na Mafunzo ya Ufundi ili kujua walimu wangapi wanatarajiwa kuhitimu katika mwaka husika wa fedha ili stahili zao na mishahara yao itengwe katika bajeti.

Niliagiza pia kwamba utaratibu huo utumike kwa madaktari na wauguzi ili mara wataalamu hao wanapohitimu masomo yao waweze kuajiriwa na kupangiwa vituo vya kazi. Vile vile, nimewakumbusha umuhimu wa kuhakikisha kwamba watumishi wapya wanaoajiriwa wanalipwa mishahara na stahili zao mara wanapowasili katika vituo vyao na kuanza kazi. Watumishi kukaa miezi kadhaa bila ya kulipwa mishahara na stahili nyingine ni jambo linalosikitisha, halikubaliki na kwamba wakati umefika lisiendelee kutokea.

Ndugu Wananchi;
Pamoja na hayo nimesisitiza kuwa mtumishi kupandishwa cheo ni stahili yake na ni haki yake ya msingi. Hivyo, wakati wake unapofika na kama hakuna sababu za msingi, lazima apandishwe cheo. Pale mtumishi anaponyimwa kupandishwa cheo wakati wake ukifika, ni vyema aelezwe sababu ili ajirekebishe. Hii pia itampa fursa ya kukata rufaa kwa mamlaka za juu iwapo hakuridhika na sababu zilizotolewa. Nimekumbusha pia kwamba watumishi wanaopandishwa vyeo mishahara yao irekebishwe mapema iwezekanavyo. Nimewataka wawajibishe maafisa wakuu wasiotimiza wajibu wao ipasavyo na kusababisha ucheleweshaji na usumbufu usiokuwa wa lazima kwa watumishi wa umma. Kwa wale waliosababisha Serikali kupata hasara kwa kulipa watumishi hewa hatua za kisheria zichukuliwe dhidi yao bila ajizi.

Uwekezaji Katika Shule za Kidato cha Tano na Vyuo vya Ufundi
Ndugu Wananchi;
Kwa upande wa elimu, nilipata taarifa kuhusu mafanikio makubwa yaliyopatikana katika kupanua fursa za vijana wetu kupata elimu, tangu ya awali mpaka elimu ya juu na mafunzo ya ufundi. Aidha, nimeelezwa hatua thabiti zinazochukuliwa za kuongeza ubora wa elimu ambazo pia zinajumuisha kuboresha maslahi na huduma kwa walimu na wakufunzi. Vile vile, nilielezwa changamoto zinazokabili sekta ya elimu na mafunzo ya ufundi pamoja na mikakati ya kukabiliana nazo. Nimewapongeza kwa juhudi hizo na kuwataka waendelee nazo, nami nimewaahidi msaada wangu bila ya kuchoka.

Ndugu Wananchi;
Miongoni mwa changamoto ambayo nitapenda kuizungumzia ni ile ya mahitaji makubwa ya nafasi za kidato cha 5 na cha 6 kwa vijana wetu. Baada ya ujenzi wa sekondari nyingi za kata, kumeanza kujitokeza ongezeko kubwa la wanafunzi watakaomaliza kidato cha nne wanaohitaji kuendelea na masomo ya kidato cha tano. Idadi itaendelea kuongezeka mwaka hadi mwaka. Hivi sasa nafasi za kidato cha tano zilizopo Serikalini ni 37,300 na mipango inaendelea ya ujenzi wa shule zenye kidato cha tano na sita katika kila tarafa. Hata hivyo, nachelea kuwa bado hazitakidhi mahitaji makubwa yanayoongezeka kila mwaka. Jambo hili lisiachiwe Serikali peke yake.
Napenda kutumia nafasi hii kurudia ombi nililotoa Dodoma hivi karibuni kwa mashirika ya dini na watu binafsi wasaidiane na Serikali kubeba mzigo huu. Naomba wajenge shule zenye kidato cha 5 na 6. Wakati huo huo nawahimiza viongozi wa Serikali wa Mikoa na Wilaya kuhakikisha kuwa lengo la kila tarafa kuwa na shule yenye kidato cha 5 na 6 linatekelezwa kwa ukamilifu.

Kilimo, Mifugo na Uvuvi
Ndugu Wananchi;
Nilipotembelea Wizara ya Kilimo, Chakula na Ushirika na Wizara ya Maendeleo ya Mifugo na Uvuvi, nimepata faraja kuwa utekelezaji wa malengo yetu ya kuleta mageuzi ya kilimo, ufugaji na uvuvi yanakwenda vizuri. Nimefurahi kuona kwamba muelekeo wa miaka mitano ijayo ni mzuri. Nimeelezwa changamoto mbalimbali zinazozikabili sekta zetu hizi na nimefurahishwa na mikakati ya Wizara zetu mbili ya kukabiliana nazo. Nilifarijika sana kusikia kuwa mipango kabambe ya kuendeleza ufugaji na uvuvi imekamilika. Mimi nimewaahidi kuwasemea kwa wanaotoa mgao wa fedha ili wawezeshwe kutekeleza malengo yao.

Ndugu Wananchi;
Hizi ni sekta muhimu sana, hivyo kuendelezwa kwake kunawanufaisha Watanzania wengi. Ukizungumzia kupunguza na hatimaye kuondoa umaskini nchini huwezi kufanikiwa bila kuendeleza sekta za kilimo, ufugaji na uvuvi ambazo asilimia 80 ya Watanzania huzitegemea.

Nilipozitembelea Wizara hizo nilisisitiza mambo manne ambayo ningependa muyafahamu. Jambo la kwanza linahusu kuutazama upya mfumo wa vocha za pembejeo ili kuleta ufanisi zaidi. Serikali imeanzisha mpango wa kutoa ruzuku kwa pembejeo za kilimo kama vile mbegu, mbolea na dawa. Mpango huu una nia ya kuwaongezea wakulima uwezo wa kupata mavuno zaidi ili waongeze kipato chao na kuinua hali zao za maisha. Tulianzisha mfumo wa vocha ili kuhakikisha kuwa ruzuku hiyo inawafikia wahusika. Kuanzia miaka miwili iliyopita kumejitokeza vitendo viovu vinavyofanywa na wajanja wachache ambavyo ni kinyume na matazamio ya Serikali. Nilishaagiza vyombo vya dola kuwasaka wahusika na kuwafikisha mbele ya sheria. Kazi hiyo inaendelea ingawaje naomba kasi na nguvu iongezeke.

Pamoja na kufanya hayo, nimeagiza tuuangalie upya mfumo wetu wa ugawaji wa pembejeo za ruzuku. Kama kuna upungufu wowote tuurekebishe, tuzibe mianya inayotumiwa na wahalifu ili ufanisi zaidi upatikane. Nimefurahishwa na taarifa kuwa Mdhibiti na Mkaguzi Mkuu wa Hesabu za Serikali ameanza kuufanyia ukaguzi mfumo wa ugawaji pembejeo ili atoe mapendekezo ya namna ya kuuboresha. Vile vile, nimefurahishwa na uamuzi wa Wizara ya Kilimo, Chakula na Ushirika wa kupeleka watu Malawi ili wakajifunze kutokana na uzoefu wa wenzetu.

Jambo la pili, linahusu kuanzisha mfumo wa masoko ya mazao ili wakulima wawe na masoko ya uhakika na yanayotoa bei nzuri. Ni jambo ambalo nimekuwa nalihimiza tangu niingie madarakani. Nilifurahi sana nilipoambiwa kuwa hivi sasa mchakato wa kuanzisha “Soko la Mazao ya Kilimo” yaani Commodity Exchange Market uko mbioni kuanza. Narudia kuwapongeza sana na kuwatakia mafanikio mema na ninawaahidi msaada wangu pale itakapostahili.

Jambo la tatu, ni kwamba nimezielekeza Wizara zinazohusika na kilimo na mifugo kushirikiana na TAMISEMI kuanza kupeleka wahitimu wa vyuo vikuu katika ngazi ya tarafa na kata ili wasaidie kuinua ubora wa kilimo na ufugaji miongoni mwa wananchi. Na, jambo la nne ninalopenda kulisemea, ni kutoa pongezi kwa Idara ya Uvuvi kwa kazi kubwa waifanyayo ya kupambana na uvuvi usiokuwa endelevu pamoja na uvuvi haramu. Narudia kuwahakikishia utayari wangu na wa Serikali kuwasaidia kuwajengea uwezo wa kutimiza wajibu wao ipasavyo.

Hifadhi ya Taifa
Ndugu Wananchi;
Nimetembelea Wakala wa Hifadhi ya Taifa ya Chakula kukagua na kupata taarifa ya shughuli zao. Nimefarijika sana kusikia kuwa malengo tuliyowawekea ya kuhifadhi tani 200,000 za mahindi mwaka huu wameyafikia na kwamba sasa wana akiba ya tani 217,000 katika maghala yao. Nimefurahishwa sana na taarifa ya jinsi Wakala hiyo inavyojiandaa kutekeleza agizo langu la kupanua uwezo wa hifadhi yetu hadi kufikia tani 400,000 mwaka 2015.

Ndugu Wananchi;
Jambo jipya ambalo nimeagiza Hifadhi ifanye kuanzia sasa ni kushiriki katika kupunguza ukali wa bei za vyakula mijini, pindi kunapojitokeza upungufu wa chakula. Natambua kuwa kila kunapotokea upungufu wa chakula vijijini, Hifadhi ya Taifa imetumika kukabiliana na tatizo hilo. Nimewataka sasa wafanye hivyo kwa mijini, kwa kuwauzia mahindi wafanyabiashara katika masoko yanayouza vyakula pale unapotokea upungufu wa mahindi yanayoletwa katika masoko.

Wakifanya hivyo, bei za mahindi zitashuka na hivyo kupunguza mfumuko wa bei kwa upande wa chakula.
Nimezungumzia mahindi kwa sababu kwa sasa hifadhi yetu hununua mahindi na mtama tu. Nimewaagiza kuwa, kwa siku za usoni waanze kuangalia uwezekano wa kununua kiasi fulani cha mchele na kuuhifadhi kwa nia ya kuuza baadae ili kupunguza makali ya bei ya chakula hicho pale, kunapotokea upungufu.

Uchukuzi
Ndugu wananchi;
Kwa upande wa Wizara ya Uchukuzi, nimerudia maelekezo yangu ya kawahimiza kuharakisha mchakato wa Shirika letu la reli kuachana na RITES na mchakato wa kuboresha reli ya Kati na TAZARA. Nimefurahi kusikia kwamba mchakato wa kununua meli mpya katika Maziwa ya Victoria, Tanganyika na Nyasa upo katika hatua mbalimbali za utekelezaji. Niliarifiwa kuwa tayari wataalam washauri kutoka Denmark wamekwishaanza kufanya upembuzi yakinifu juu ya aina ya meli itakayofaa katika Ziwa Victoria. Nimewaagiza, waharakishe kukamilisha mchakato huo ili waendelee na zoezi kama hilo katika Maziwa Nyasa na Tanganyika na hatimaye ununuzi wa Meli ufanyike.

Hali ya Umeme Nchini
Ndugu Wananchi;
Mgao wa umeme bado unaendelea nchini, ingawaje kwa muda wa wiki moja hivi kumekuwepo na nafuu kidogo. Hii imetokana na maji kuongezeka katika mabwawa ya Kihansi na Kidatu kutokana na mvua zinazonyesha katika milima ya Udzungwa. Kwa sababu hiyo, uzalishaji wa umeme katika mabwawa hayo umeongezeka kiasi na kuleta nafuu kidogo iliyopo sasa.

Hata hivyo, ahueni hii si ya kutegemea sana kwani hali katika bwawa la Mtera bado siyo nzuri, hivyo siku yoyote mvua hizo zitakaposimama au kupungua katika milima ya Udzungwa mgao utarudi kwa makali yake ya awali. Hadi leo nizungumzapo nanyi, kina cha maji katika bwawa la Mtera kimefikia mita 690.88 ambacho bado ni chini sana. Maji yapo juu ya kina cha ukomo wa chini kwa sentimeta 88 tu, hivyo bado tuna safari ndefu mpaka kufikia kina cha juu cha mita 698. Tuzidi kumuomba Mola mvua kubwa zinyeshe katika milima na mabonde ya mito inayoingiza maji katika Bwawa la Mtera.

Ndugu Wananchi;
Kama nilivyokwishaeleza, hivi sasa TANESCO wanaendelea na mchakato wa ukodishaji wa mitambo ya dharura ya kufua umeme wa megawati 260. Tayari zabuni imekwishatangazwa ili kumpata mkandarasi atakayekidhi viwango na mwenye gharama nafuu. TANESCO wameahidi kuwa ifikapo mwezi Julai uzalishaji wa umeme huo wa dharura utakuwa umeanza. Nimewaagiza TANESCO na Wizara ya Nishati na Madini kuhakikisha kuwa mpango huo unatekelezwa kama ilivyopangwa. Aidha, nimewataka waongeze kasi ya kutekeleza mipango mingine ya kulipatia taifa umeme wa uhakika na endelevu katika kipindi kifupi kijacho.

Gharama za Kuunganisha Umeme
Ndugu Wananchi;
Jambo jingine ambalo niliwataka TANESCO waliangalie haraka ni lile la gharama kubwa za kuwaunganishia wateja umeme. Gharama hizo zinawakwaza wananchi wengi kupata umeme. Nimewataka waangalie uwezekano wa kuzipunguza au hata kuwaunganishia watu umeme na kuingiza gharama hizo katika bili za umeme za kila mwezi. Nimewasihi kuwa iwapo wataamua hivyo, wawape muda wa kutosha wa kulipa. Usiwe muda mfupi kwani utakuwa mzigo mkubwa mno kwao. Nimewakumbusha pia kuwa tunalo lengo la kuwapatia umeme asilimia 30 ya Watanzania ifikapo 2015. Lengo hilo halitafanikiwa iwapo hatutatafuta namna ya kupunguza gharama au kutoa nafuu katika kuunganisha umeme kwa watu.

Matukio ya Ujangili katika Hifadhi
Ndugu Wananchi;
Nilipotembelea Wizara ya Maliasili na Utalii, pamoja na mambo mengine, tulizungumzia tatizo la kuongezeka kwa vitendo vya ujangili katika mbuga za wanyama zinazoangaliwa na Serikali au mashirika yake. Kuna kila dalili kwamba mamlaka za hifadhi zetu zinaelekea kuelemewa na majangili. Nimewaagiza waongeze juhudi na nimewaambia kuwa niko tayari kuagiza Jeshi la Ulinzi la Wananchi wa Tanzania kusaidia kupambana na majangili. Nchi yetu inayo historia ya kufanya hivyo mwaka 1989 kwa mafanikio. Niko tayari kufanya hivyo tena.

Jambo lingine ambalo nililizungumzia ni mchakato wa Wizara wa kutaka kuitangaza misitu ya milima ya Tao la Mashariki yaani milima ya Pare, Usambaa, Uluguru, Nguu hadi misitu ya Udzungwa kuwa urithi wa dunia (World Heritage Site). Lengo linaweza kuwa zuri kwamba nchi yetu inaweza kupata misaada ya kuhifadhi misitu hiyo. Lakini, uamuzi huo una maana kubwa kwa watu wa maeneo hayo, mamlaka za Serikali za Mitaa na hata nchi kwa jumla. Kwa mujibu wa utaratibu uliopo, watu au hata mamlaka ya nchi haitaweza kuamua kufanya jambo lolote katika maeneo hayo bila ya kupata kibali cha UNESCO.

Ndugu Wananchi;
Kwa Tanzania kufanya kitu cha namna hiyo si jambo la ajabu kwani tunayo maeneo kadhaa ambayo tumekwishayaingiza kwenye kundi la urithi wa dunia. Hata hivyo, inatakiwa pawepo na mashauriano mapana na wadau wote na kuafikiana kabla ya kupeleka maombi UNESCO. Bahati mbaya kwa suala hili haikufanyika hivyo, jambo ambalo siyo sawa. Niliwataka waondoe maombi hayo na kama wanaona ifanyike hivyo, tupate muda wa kutosha wa kushauriana na kukubaliana ipasavyo.

Ripoti ya Mdhibiti na Mkaguzi wa Hesabu za Serikali
Ndugu Wananchi;
Tarehe 29 Machi 2011 Ndugu Ludovick Utouh, Mdhibiti na Mkaguzi Mkuu wa Hesabu za Serikali alinikabidhi Ripoti za Ukaguzi wa Hesabu za Serikali Kuu, Serikali za Mitaa na Mashirika ya Umma kwa mwaka 2009/2010. Amefanya hivyo kwa mujibu wa matakwa ya Katiba ya Jamhuri ya Muungano, ibara ya 143 (iv). Nami kwa mujibu wa matakwa ya Katiba hiyo, nimeshawasilisha taarifa hizo kwa Waziri Mkuu na Waziri wa Fedha kwa ajili ya kuziwasilisha Bungeni.

Narudia tena kumshukuru sana Ndugu Ludovick Utouh na wakaguzi wenzake wote kwa kazi nzuri wanayoifanya ya kukagua hesabu za Serikali. Taarifa za Mdhibiti na Mkaguzi Mkuu wa Hesabu za Serikali zimekuwa kioo kizuri kwetu sisi katika Serikali kujiona na kujipima jinsi tunavyotimiza wajibu wetu kuhusu sheria na kanuni za fedha na manunuzi ya umma.

Ndugu Wananchi;
Inatia moyo kuona kuwa, idadi kubwa ya Wizara na Halmashauri zinaendelea kufanya vizuri na kupata hati zinazoridhisha. Hata hivyo, haifurahishi kuona kuwa idadi hiyo imepungua kuliko ile ya mwaka 2008/2009. Inasikitisha pia kwamba idadi ya Halmashauri za wilaya zilizopata hati chafu imeongezeka kutoka moja mwaka 2008/2009 na kuwa nne mwaka 2009/10. Kwa upande wa Serikali Kuu hapakuwepo na mabadiliko kwani idadi ya hati zisizoridhisha imebaki ile ile, yaani Mkoa mmoja na Idara moja kama ilivyokuwa mwaka uliopita. Lakini, baya zaidi ni mkoa huo huo na hali ya hesabu za Halmashauri nchini bado zina mapungufu mengi hivyo kuhitaji hatua maalum kuchukuliwa ili kuondokana na aibu hiyo.

Ndugu Wananchi;
Napenda kurudia maagizo niliyoyatoa miaka ya nyuma ya kutaka viongozi na watendaji wakuu wa kila Wizara, Taasisi ya Serikali na Mashirika ya Umma yaliyokaguliwa kuisoma ripoti ya Mdhibiti na Mkaguzi Mkuu wa Hesabu za Serikali kuhusu maeneo yao. Kisha wachukue hatua zipasazo kusahihisha kasoro zilizojitokeza katika maeneo yao ya uongozi na utendaji. Kwa makosa yanayojirudia mwaka hadi mwaka na yale ya wizi na ubadhilifu, mamlaka ya juu kwa kila ngazi ichukue hatua stahiki za kinidhamu na kisheria kwa wahusika.

Nampongeza sana Mdhibiti na Mkaguzi Mkuu kwa kuanza na kuendelea na ukaguzi wa ufanisi katika baadhi ya taasisi za Serikali. Nafurahi pia kwamba ameahidi kufanya kwa upana zaidi ukaguzi wa thamani ya fedha zaidi ya ukaguzi wa hesabu. Sote tuwatakie mafanikio mema ili fedha na rasilimali kidogo tulizonazo zifanye kazi iliyokusudiwa na kunufaisha walengwa.

Mchakato wa Katiba
Ndugu Wananchi;
Katika Hotuba yangu ya Mwisho wa Mwaka, niliahidi kwamba tutaanzisha mchakato wa kuhuisha Katiba ya nchi yetu. Tayari tumeanza utekelezaji wa ahadi hiyo. Katika kikao cha Bunge kitakachoanza Jumanne, wiki ijayo, muswada wa sheria kwa ajili ya kusimamia mchakato huo utawasilishwa na Serikali. Miongoni mwa mambo mengine, Muswada huo umeainisha utaratibu wa uundwaji wa Tume ya Katiba (Constitutional Review Commission), utaratibu wa kukusanya maoni, uundwaji wa Bunge la Katiba na wananchi kupiga kura ya maoni kupitisha Katiba hiyo (referendum).
Utaratibu unaopendekezwa umejengeka juu ya msingi wa kuwahusisha wananchi wote wanaostahili kushiriki katika mchakato wa uundwaji wa Katiba yao mpya. Mchakato huu ni muhimu sana kwa mustakabali wa taifa letu, hivyo kila mmoja wetu ajitahidi kushiriki kutoa maoni yake kadri anavyoona inafaa wakati ukifika.

Hitimisho
Ndugu Wananchi;
Naomba nimalizie kwa kuwashukuru wananchi kwa kuendelea kuiunga mkono na kuisaidia Serikali yenu. Tuendelee kufanya kazi kwa bidii na maarifa kwa maslahi ya kila mmoja wetu, familia zetu na nchi yetu kwa ujumla.
Mungu Ibariki Afrika!
Mungu Ibariki Tanzania!
Asanteni sana kwa kunisikiliza!

CUF NAO WATUMA SALAMU ZAO ZA RAMBIRAMBI!!

Jumuiya ya Vijana ya CUF – (JUVICUF) tumepokea kwa masikitiko makubwa taarifa ya vifo vya waimbaji wa Bendi ya Taarab (Five Stars Modern Taarab) vilivyotokea kwa ajali ya gari huko Mikumi Mkoani Morogoro wakati wakitokea Mbeya kuwapa Burudani wakazi wa huko.

Ajali za barabarani zimekuwa zikipoteza mamia ya roho za watanzania ambao wengi wao ni vijana jambo linalo sababisha kupoteza nguvu kazi ya Taifa letu, na nyingi ajali hizo zinatokana na uzembe wa madereva .

Jumuiya ya Vijana ya CUF – tunasisitiza serikali kupitia Wizara ya Mambo ya Ndani na Wizara ya Miundo Mbinu kutowafumbia macho madereva wazembe na kuhakikisha wanachukuliwa hatua kali za kisheria

Jumuiya ya Vijana ya CUF – tunaungana na watanzania wote kuwapa pole na kuwafariji ndugu, wapenzi wa muziki wa taarabu nchini pamoja na jamaa wa marehemu. tunawaomba kuwa na moyo wa subira katika kipindi hiki kigumu cha majonzi na maombolezo na tunamuomba mungu azilaze mahali pema peponi roho za marehemu hao.

Halikadhalika tunawaomba wale wote waliojeruhiwa wawe na subira na tunawaombea kwa mwenyezi mungu wapone haraka ili waweze kuendelea na shughuli zao za ujenzi wa Taifa letu.

IKULU YATOA SALAMU ZA RAMBIRAMBI MSIBA WA WASANII WA FIVE STARS!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amemtumia salamu za rambirambi Waziri wa Habari, Vijana, Utamaduni na Michezo, Mheshimiwa Emmanuel Nchimbi kutokana na vifo vya wasanii 13 wa Kundi la Muziki wa Taarab la Five Star Modern Taarab.

Wasanii hao waliokuwa kwenye gari la kukodi wakitokea Kyela, Mbeya, walipata ajali eneo la Doma, karibu na Mbuga ya Wanyama ya Mikumi, Mkoani Mororogoro usiku wa kuamkia tarehe 22 Machi, 2011 wakati gari hilo lilipogongana na gari lingine. Wasanii hao walikuwa wakirejea Dar es Salaam kutoka Mbeya ambako walikuwa wamefanya maonyesho.

Watu 12 walifariki hapo hapo, mwingine akafariki njiani akikimbizwa hospitali na watu wengine wanane kujeruhiwa kwa viwango tofauti.

“Binafsi nimeguswa mno na msiba huu kwa vile umetupotezea wasanii ambao walikuwa na mchango mkubwa katika kukuza na kuendeleza sanaa ya muziki wa Taarab nchini kwetu. Hili ni pigo kubwa siyo kwa usanii wa Taarab bali kwa Taifa letu zima la Tanzania.” Amesema Rais Kikwete katika salamu zake.

Ameongeza Mheshimiwa Rais katika salamu zake: “Nakutaka Mheshimiwa Waziri kupitia kwako ufikishe salamu zangu hizi za rambirambi kwa ndugu wa wafiwa wote. Wajulishe kuwa moyo wangu uko nao katika wakati huu mgumu na kuwa msiba wao ni msiba wetu sote.”

Rais Kikwete amesema anamwomba Mwenyezi Mungu azilaze mahali pema peponi roho za Marehemu wote huku akiwaomba waliopoteza wapendwa wao katika ajali hiyo mbaya kuwa na moyo wa uvumilivu, ujasiri na subira katika kipindi hiki kigumu cha maombolezo.

Vilevile Rais Kikwete anawaombea kwa Mwenyezi Mungu wote waliojeruhiwa kwenye ajali hiyo mbaya wapone haraka ili waweze kurejea katika hali yao ya kawaida na kuungana tena na familia, ndugu, jamaa na marafiki zao.

MOURINHO AVUNJA MWIKO KWA LYON!!

Klabu ya Real Madrid imefanikiwa kutinga hatua ya Robo Fainal baada ya kuvunja mwiko wa kuwa kibondr mbele ya Olympique Lyon baada ya kushinda kwa magoli 3-0. Klabu ya Chelsea nayo imesonga mbele baada ya kutoka sare ya 0-0 dhidi ya FC Copenhagen!!

CUF WAANZA KUWASHUKURU WAPIGA KURA!!

Waheshimiwa waandishi wa Habari, CUF- Chama Cha Wananchi kitafanya ziara ya awali ya kuwashukuru wapigakura katika mikoa ya Tanga, Dar es Salaam, kisiwa cha Unguja, Lindi, Mtwara na Pwani kuanzia tarehe 19/03/2011 hadi tarehe 02/04/2011.

Ziara itaongozwa na Mwenyekiti wa CUF - Taifa, Prof. Ibrahimu Haruna Lipumba akifuatana na Kaimu Naibu Katibu Mkuu - Bara, Mhe. Julius Mtatiro, Wajumbe wa Baraza kuu la Uongozi - Taifa, Kiongozi wa wabunge wanaotokana na CUF ( Mh. Hamad Rashidi) na baadhi ya wabunge wanaotokana na CUF.



Malengo

· Kuwashukuru wabiga kura kwa kukipigia Chama Cha Wananchi (CUF) katika uchaguzi mkuu wa 31, Oktoba, 2010

· Kuishitaki kwa wananchi serikali ya CCM kwa kushindwa kuboresha maisha ya wananchi wake na kusababisha:-

o Kukosekana kwa umeme wa uhakika,

o Kupanda kwa gharama za maisha mfano bidhaa, nauli, na nk,

o Matatizo makubwa katika sekta ya afya,

o Uhaba wa maji , ukosefu wa ajira

o Miundombinu mibovu ya barabara, reli na nk

o Matatizo katika sekta ya Elimu na pia:-

Kuitaka Serikali ya CCM kuhakikisha kuwa mchakato wa Tume Huru ya Uchaguzi unafanyika mapema bila kusubiri mchakato wa kupata Katiba Mpya ya nchi.

CUF- Chama Cha Wananchi tunaamini kuwa ziara hii ni muhimu kwa wananchi wote,na tutatumia fursa hii kuwahakikishia wananchi kwamba CUF iko bega kwa bega na wananchi wote bila kujali itikadi zao za rangi, dini au kabila ili kuwaletea ukombozi wa kweli wa kiuchumi na kijamii.

ZIARA YA RAIS KIKWETE HAZINA YAIBUA MAMBO MENGI!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete Jumanne, Machi 15, 2011, ametembelea Wizara ya Fedha (Hazina), ikiwa ni mwanzo wa ziara za kutembelea Wizara mbalimbali kujionea utendaji wa Serikali, kuangalia utekelezaji wa maagizo ya Serikali na yale aliyoyatoa alipotembelea wizara zote mwanzoni mwa mwaka 2006, mwezi mmoja tu baada ya kuwa ameingia madarakani.

Aidha, Rais baada ya kuwa ametembelea Wizara ya Fedha ametembelea Kitengo cha Long Room cha Mamlaka ya Kodi Tanzania (TRA).

Katika mazungumzo na viongozi wa Wizara na taasisi zote zilizoko chini ya Wizara hiyo, Rais Kikwete ameelezea majukumu matatu makuu ya Wizara hiyo kama ifuatavyo:

(a) Kusimamia Kukua kwa Uchumi

Rais Kikwete amesema kuwa wajibu kipaumbele katika miaka mitano ijayo iwe ni kwa Wizara ya Fedha kusimamia na kutafuta njia za kuleta utulivu zaidi katika uchumi kwa kubuni mikakati bora zaidi ya kuhakikisha uchumi wa Tanzania unakua kwa kasi zaidi na hivyo kupunguza umasikini kwa haraka zaidi. Hivyo, Rais amesema kuwa hata Bajeti ya Serikali ni lazima ilenge katika sekta zitakazoharakisha zaidi kasi ya kukua kwa uchumi.

Sambamba na agizo hilo, Rais Kikwete pia ameielekeza Wizara ya Fedha kutafuta njia za haraka na bora zaidi za kupunguza mfumuko wa bei ili kuwapatia wananchi unafuu zaidi wa maisha.

(b) Ukusanyaji Mapato ya Serikali

Rais Kikwete amesisitiza kuwa Hazina ndiyo moyo na roho ya Serikali na kwamba Wizara hiyo isipofanya kazi ya kukusanya mapato ni dhahiri shughuli za Serikali zitaathirika.

Rais amewasifu watumishi wa Wizara ya Fedha kwa kufanya vizuri katika ukusanyaji wa mapato ya Serikali lakini akawataka waongeze juhudi zaidi na wafanye vizuri zaidi. Ameambiwa kuwa mapato ya Serikali yameongezeka kutoka makusanyo ya kiasi cha shilingi bilioni 215 kwa mwezi mwaka 2005 wakati Rais kikwete anaingia maradakani hadi kufikia wastani wa shilingi bilioni 420 kwa mwezi kwa sasa.

(C) Kusimamia Matumizi ya Fedha ya Serikali

Rais Kikwete amesema kuwa jukumu la tatu la msingi la Wizara hiyo ni kusimamia matumizi ya fedha zinazokusanywa akiwakumbusha viongozi hao kuwa fedha za Serikali siyo shamba la bibi na wala makusanyo hayo ya kodi siyo sawa na ubani wa kilioni.

Amesema kuwa fedha za Serikali baada ya kukusanywa ni lazima zitumike vizuri na kwa shabaha zilizokukusudiwa na akaelezea ni sababu hiyo iliyopelekea Serikali kuchukua hatua za kuimarisha usimamizi wa matumizi ikiwa ni pamoja na kuunda nafasi ya Naibu Mhasibu Mkuu wa Serikali kwa ajili ya kusimamia fedha zinazopelekwa kwenye Halmashauri mbalimbali nchini na pia kuanzisha nafasi ya Mkaguzi Mkuu wa Serikali.

(D) Maagizo Mengine Makubwa

(i) Rais Kikwete amesema kuwa moja ya maeneo ambayo bado yana matatizo katika Wizara hiyo ni shughuli ya Manunuzi na ameitaka Wizara ya Fedha kuhakikisha kuwa wanaajiriwa watu wenye ujuzi na elimu ya masuala ya ununuzi lakini ambao pia ni waaminifu.

(ii) Rais Kikwete pia ameitaka Wizara hiyo kukabiliana na tatizo la kucheleweshwa kulipwa kwa mishahara mipya hasa ile ya watumishi wapya katika Serikali. Aidha, amerudia maelekezo yake kuwa Halmashauri nchini haziwezi kuruhusiwa kuhamishahamisha watumishi bila na kuwa na fedha za kulipia uhamisho huo.

(iii) Kuhusu malipo ya mishahara na marupurupu mengine ya watumishi, Rais Kikwete ametaka umakini mkubwa katika kuhakikisha kuwa haki za watumishi zinalindwa na watu hao kulipwa malipo yao ya haki na kwa wakati.

(iv) Kuhusu malipo ya wasataafu wa iliyokuwa Jumuia ya Afrika Mashariki iliyovunjika, Rais Kikwete ametaka wote wanaostahili kulipwa mafao yao na hawajalipwa hadi sasa walipwe, hata kama ni kweli kuwa wengi wa watumishi hao tayari wamelipwa.

(v) Kuhusu mikopo kwa watumishi wa Serikali, Rais Kikwete amesema amefurahishwa na kwamba Wizara ya Fedha inakamilisha taratibu za kuwakopesha watumishi hao, kama wanavyokopeshwa Wabunge. Aidha, ameongeza kuwa Wizara iangalie uwezekano wa hata kuwadhamini watumishi hao ili waweze kukopa moja kwa moja kwenye taasisi za fedha nchini.

(vi) Kuhusu Deni la Taifa, Rais Kikwete amesema kuwa ni jambo la heri sana kuwa Tanzania sasa inakopesheka tena, lakini lazima Wizara ya Fedha itumie uangalifu mkubwa katika kukopa ili Tanzania ijikute inarudi tena katika mazingira yaliyopelekea kuachwa kukopeshwa huko nyuma.

ARSENAL YASISITIZA DJOUROU NJE MSIMU WOTE!!

Klabu ya Arsenal maarufu kama Washika Bunduki wa Jiji la London wametoa taarifa inayosisitiza watamkosa Baki wake wa Kati Rais wa Uswiss kwa muda wote uliosalia kabla ya kumalizika kwa msimu. Johan Djourou alipata maumivu ya bega baada ya kugongana na Bakar Sagna katika mchezo wa Robo Fainal wa Kombe la FA dhidi ya Manchester United!!

MAN UTD NA INTER MILAN ZATINGA ROBO FAINAL CHAMPIONS LEAGUE!!

Klabu ya Manchester United ikiwa nyumbani katika Dimba la Old Trafford wamefanikiwa kutinga Robo Fainal ya Ligi ya Mabingwa baada ya kuichakaza Marsseile kwa magoli 2-1!! Wakati Mabingwa Watetezi Inter Milan wamefanikiwa kuibuka kidedea mbele ya Bayern Munich kwa magoli 3-2 na kuendelea na mbio zao za kusaka Ubingwa!!

ARSENE WENGER ALIA NA MASSIMO BUSACCA!!

Kocha wa Arsenal, Arsene Wenger ameibuka mbogo na kumlaumu vikali Mwamuzi wa mchezo wao dhidi ya Barcelona, Massimo Busacca!! Kwa kifupi tu wale wasiomfahamu Busacca ni mwamuzi wa Uswiss tangu mwaka 1990 na alipata Beji ya FIFA mwaka 1999!! Lakini huyu ndiye aliyechezesha mchezo wa Fainali wa Ligi ya Mabingwa kati ya Barcelona na Manchester United!! Wenger na Rob Van Persie ambaye alizawadiwa kadi nyekundu kila mmoja amemlaumu Mwamuzi huyo kwa kusema alibadili mchezo baada ya kutoka kadi ya njano ya pili!!

RAIS KIKWETE SAFARINI ADDIS ABABA!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete leo, Jumatano, Machi 9, 2011, anaungana na marais wenzake wa Afrika waliopewa jukumu la kutafuta suluhu ya mgogoro wa kisiasa katika nchi ya Afrika Magharibi ya Ivory Coast, katika hatua za mwisho za jitihada za kujaribu kumaliza mgogoro huo.

Rais Kikwete na marais wenzake wanakutana mjini Addis Ababa, Ethiopia, katika jitihada mpya za kutafuta jawabu la mzozo huo uliolipuka mwishoni mwa mwaka jana kufuatia matokeo ya raundi ya pili ya uchaguzi wa Rais wa nchi hiyo uliofanyika Novemba 28, 2011.

Katika mkutano huo wa siku mbili, marais hao wanatarajiwa kukabidhi ripoti yao kwa Kamati ya Amani na Usalama ya Umoja wa Afrika (AU), ili kuuwezesha Umoja huo kuchukua uamuzi kamili wa jinsi ya kumaliza mgogoro huo.

Ripoti hiyo ni matokeo ya mikutano ya marais hao mjini Addis Ababa, huko Mauritania ambako walikutana mara mbili, na mjini Abidjan, Ivory Coast. Marais hao waliteuliwa na Kikao cha Wakuu wa Nchi Wanachama wa AU katika mkutano wao wa Januari mwaka huu.

Rais Kikwete ameondoka nchini leo asubuhi kwenda Ethiopia kwa kikao hicho cha siku mbili ambako ataungana na Rais Jacob Zuma wa Afrika Kusini, Rais Idriss Deby wa Chad, Rais Blaise Campaore wa Burkina Faso na Rais Mohamed Abdel Aziz ambaye ni mwenyekiti wa kundi hilo.

Wengine wanaotarajiwa kushiriki katika kikao hicho ni Mwenyekiti wa Kamisheni ya Umoja wa Afrika (AU) Bwana Jean Ping na wawakilishi wa Jumuia ya Uchumi ya Afrika Magharibi (ECOWAS) na Umoja wa Mataifa (UN).

Mzozo wa Ivory Coast ulianza baada ya taasisi mbili zinazosimamia uchaguzi nchini humo kutangaza matokeo tofauti ya washindi wa raundi hiyo ya pili ya upigaji kura kati ya Mheshimiwa Laurent Gbagbo, aliyekuwa anatetea kiti chake na mpinzani wake mkuu, Mheshimiwa Alassane Quattara.

Tume ya Uchaguzi ya nchi hiyo ilimtangaza Quattara kuwa mshindi wa uchaguzi huo kwa asilimia tisa, lakini siku nne baadaye, Baraza la Katiba la nchi hiyo lilimtangaza Gbagbo kuwa mshindi kwa asilimia moja.

Baraza hilo lilimtangaza Gbagbo mshindi baada ya kuwa limefuta matokeo katika majimbo saba aliyokuwa ameshinda Quattara, kaskazini mwa nchi hiyo ambako ndiko ngome kuu yake ya kisiasa. Kwa kufuta matokeo katika majimbo hayo, Baraza lilimpunguzia Quattara kura 600,000.

Tokea wakati huo, viongozi hao wawili wote wamejitangaza marais na kila mmoja kuunda Serikali yake. Nchi hiyo sasa imetumbukia katika mgogoro kamili wa kisiasa na vita ya wenyewe kwa wenyewe ambako yamekuwepo mauaji ya watu na uharibifu mkubwa wa mali nchini humo.

IKULU YATEUA MNIKULU MPYA!!

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amemteua Bwana Shabani R. Gurumo kuwa Mnikulu (State House Comptroller).

Taarifa iliyotolewa Ikulu, Dar es Salaam, leo, Jumatano, Machi 9, 2011 na Katibu Mkuu Kiongozi, Ndugu Phillemon Luhanjo inasema kuwa uteuzi huo unaanza mara moja.

Kabla ya uteuzi wake, Bwana Gurumo alikuwa Naibu Katibu wa Rais.

Bwana Gurumo anachukua nafasi iliyoachwa wazi na Marehemu Rajab Kianda ambaye alifariki dunia Februari 7, mwaka jana, 2010.

Mnikulu ndiye msimamizi mkuu na kiongozi wa shughuli zote za nyumbani za Rais wa Jamhuri ya Muungano wa Tanzania na familia yake, na pia ndiye mkuu wa watumishi wote wanaohusika na shuguli hizo.

Aidha, Mnikulu ndiye msimamizi wa Ikulu na Ikulu Ndogo zote nchini na ndiye hukaribisha mabalozi wapya wanaoziwakilisha nchi zao katika Tanzania wanapokwenda Ikulu kukabidhi Hati za Utambilisho wao kwa Rais wa Jamhuri ya Muungano wa Tanzania.

BARCELONA WADHIHIRISHA WAO NI WABABE MBELE YA ARSENAL!!

Barcelona wamefanikiwa kukata kidomodomo cha Arsenal baada ya kusitisha safari yao ya Ligi ya Mabingwa katika hatua ya mtoano!! Safari ya Arsenal ilifikia tamati Nou Camp!!

MAAMUZI YA UTATA YAENDELEA LIGI KUU ENGLAND!!

Mtafaruku uliozuka baada ya Jamie Carragher kumchezea rafu mbaya Luis Almeida Da Cunha Nani na kisha Refa Philp Dowd kutoa maamuzi ya kuchelewa na ambayo hayakuwa sahihi!! Maamuzi yanaendelea kuwa ni mabovu kila kukicha katika Ligi nchini England na kutishia kuharibu ubora wa Ligi hiyo!! Katika mchezo huo Man Utd walichakazwa magoli 3-1 na Liverpool!!